Миграгъ Мардали (1820-1927)


Миграгъриз хтайла лагьай чIал

Куьне завай хабар кьазва, хуьруьнбур:
- Мардали, вуч хабар ава Къубада?
За квез лугьун заз акурвал, хуьруьнбур:
- Къиздирмадин цIаяр ава Къубада.

Кесиб инсан кесиб язва вирина,
Девлетлуяр ава чпиз кефина,
Мардалидин рикI цIразва дердина:
Гишинбурун сувар ава Къубада.

Кесиб синиф акъатзавач фитедай,
Девлетлуйрин физвач абур вягьтедай,
Дуьнья я им икI чIур хьанвай сифтедай,
Чи пай квачир ракъар ава Къубада.

Кавалар цваз гьисабзава кIвал-уба.
Мад Къубадиз хъфин ийизва туба,
Куь Мардали хтанва гваз буш турба,
Такурбуруз сувар ава Къубада.


Жуван пеше

Къекъвезва зун кIвал-уба,
Мецел алаз са суал:
- КIанзавачни цваз кавал?
Дерзичивал пеше яни?

Иесиди чIурна чин,
Вегьиз хъицикь вилик вин,
Даим рикI аваз кин,
Дерзичивал пеше яни?

Акваз агъзур кIвал-уба,
Мусибатар мад зурба,
Гьикьван уна за туба!
Дерзичивал пеше яни?


Етимдикай

Тандал алач адан партал,
Я руфуна тухдалди фу,
КIвалахиз кIанз физва патал,
Мурадар ава етимдихъ.

Аватнава бармакдин кIукI,
Шаламарни хьанва кукIвар,
Са сив фуахъ жезва ам лукI,
Умудар ава етимдихъ.

Хьанва адаз чиликай мес,
Цавукайни цIару яргъан.
Зайиф жезва Мардалид сес,
Юлдашар ава етимдихъ.


Шалбуз дагъдиз

Вирида вун такабур я лугьузва,
Вирида вал дамахзава, я Шалбуз.
И дуьньяда вуч патал ви рикI кузва?
ТахьайтIа ваз аквазвачни чилер буз?

Такабурди уьтквем жеда женгина,
Такабурдаз эвел-эхир хъел къведа.
Бес вучиз вун лал хьанва чи бягьсина?
Килиг, ахпа ви рикIелни хер жеда!

Агь, вуч я дагъ.. цал галачир багъ хьтин,
Къвез къачудай гьар са касди вичиз дул.
Халкьдин арха Шарвели тир дагъ хьтин,
Шарвелияр лагьайтIа, чахъ жезва бул...


Манкъулид хуьряй тир гуьзелдиз

На яд гъана авуна чай,
Ви гъилелай кIанда заз пай.
И хуьрера авач ви тай,
Къирмаждин буй авай гуьзел.

Ажеб къешенг расна кьечIем,
На кьечIемдиз янава чIем,
Лацу чандив чIугваз тур дем,
Къирмаждин буй авай гуьзел.

Вуч хъсан на расна зилфер,
Ваз килигда гзаф эллер,
Йигаз къвазна чIулав вилер,
Къирмаждин буй авай гуьзел.

Пелел ала пуд тIуб буфта,
Перем я ви къацу тафта,
Гъуьл кIвалевач дуьз са гьафте,
Къирмаждин буй авай гуьзел.

Худади ваз ганава суй,
Мардилидкай кефи тахуй,
Са аш ая – лагь на заз хьуй!
Къирмаждин буй авай гуьзел.

Источник ©
Лента новостей
ОПРОС
Как Вы сморите на то, чтобы издание «ЛезгиЯр» публиковало не только лезгинские новости?
Всего ответов: 691
Реклама
Реклама
ЛезгиЯр на Facebook
Партнеры ЛезгиЯр
Лезги литература
Статистика

Яндекс.Метрика

Наша Кнопка

Онлайнда авайбур: 31
Мугьманар: 29
Иштиракчияр: 2
Jurnalist, Alpangirl

Сегодня нас посетили: