Яд сунадихъ ишезва вун

Кьил вине кьаз, яр хъуькъвеллаз, чархар ягъиз, элкъвезва вун,
Вуч мурад гваз, вил рекьеллаз, безетмишна, хуьрезва вун?
Нурлу вилер, зиринг кIвачер къалуриз вав гва хупI дамах,
Яр къекъифна, ийиз кьуьлер, лагь, гьи катрахъ къекъезва вун?

Гуьзел къамат, шумал беден тежер кьадар чIагур ийиз,
Атирдин цуьк, эй гуьлчимен, нин пак рикIихъ гелкъвезва вун?
Абдулгьамид, устад гьабиб, жуван кьадар-кьисмет течиз,
Куьз дердиниз тежез тIебиб, яд сунадихъ ишезва вун?


Фимир вун

Агь, ширин мез, гуьрчег къамат, килиг заз,
Яб телягьиз, уьркуьтмиш жез, фимир вун.
РикIин гьисдихъ кьисметдин хат гилиг заз,
Элкъуьгъ чахъди, кьил хураваз фимир вун.

Гъафиларна, рикIел кайи хер тамир,
Кабабна чан, заз айгьамдин хъвер тамир,
Ашкъидин цIай, зав гвай къенд-шекер тамир.
Сабур кьатIна, яд-чарадаз фимир вун.

Вун яр ятIа, са дил жаваб ая заз,
РикIин хиял лагь, на жуван гумир наз.
Ирид йис я зун ви дердина кьураз,
Икьван ви гъам зи чандамаз фимир вун.

Куьз вуна зал алпандин цIай алтIумна?
Несиб тахьай за зи кьисмет алцумна.
Ви кIани яр, кукупI цихъ хьиз магьрумна,
Чан гъед-чирагъ, нур гъапамаз фимир вун.

Им кар хьанач вуна авур бейхабар,
Яб телягьиз мийир вуна зи рикI тIар.
Вун паталди чIулав авур табагъ чар
КIел тавуна, рахаз-рахаз фимир вун.

Хкетрик квай гьуьлуьн руш хьиз къалуриз,
Абдулгьамид виртIед мум хьиз цIуруриз,
Чи бахтунин къелем ядсуз кьуруриз,
Гъейри касдиз бустан кутаз фимир вун.


Амани?

Дертэгьли кас, дердер пайиз луькIуьнал
Ви дерт кьадай муъмин инсан амани?
ТIазвай рикI гваз вун чуьллера къекъуьнал
Ви тIалдихъ са жерягь, дарман амани?

Мермердин къван мерд инсандин секуь я.
Йиф хьайила, дуьне, лагь, низ экуь я?
Лугьудайла вун вучиз икI буьркьуь я?
Ви шел кьадай чIал чир лукьман амани?

Саилдивай тIалабдайла дишкири,
Мердимазар хьайла буьтуьн чил вири,
Тахьайла чир агьвалатар мад жери,
Куьмек гудай эгьли-жаван амани?

Серсер хьайла, кесиб, арха авачир,
Вичин чандик зерре къуват кумачир.
Къази-фахра кIватIна рекье амачир,
Асмишдайла, хуьдай аслан амани?

Абдулгьамид, накъвар селлер хьуналди,
Геже-гуьнда халикь эзберуналди,
ЧIалар атIуз, икьван бейтер кьуналди,
Вахъ кIвал-югъ, я таза жейран амани?

Къизилгуьл

Дамах-чагъ гваз физ, виликай алатиз,
Чанда гьикьван цIай твада на, Къизилгуьл?
Шем-чирагъ хьиз, хквез, рикIив агатиз,
Чанда гьикьван цIай твада на, Къизилгуьл?

Цуьк ахъагъай шумал беден чIагуриз,
Тер къекъведай къвед хьана, жув къалуриз,
Зай хьайи рикI пияладив ацIуриз,
Чанда гьикьван цIай твада на Къизилгуьл?

Рагъ кIевириз, дуьнья на заз дар ийиз,
Зар-зибаяр вавди кьаз, инкар ийиз,
Заз чигедин марфадикай хар ийиз
Чанда гьикьван цIай твада на Къизилгуьл?

Катра ериш, ашкъи хура амачиз,
Сирдаш хьана, са дил жаваб авачиз,
Перванадин ихтибарвал алачиз,
Чанда гьикьван цIай твада на Къизилгуьл?

Магьидин тан, нехиш атIай чIурар гваз,
Некьид пIузар, нуьгвед ичер хурар гваз,
ЧIилихъвидин ивидин шагь дамар гваз,
Чанда гьикьван цIай твада на Къизилгуьл?



Поддержим Лезгинский бизнес
Лента новостей
ОПРОС
Как Вы сморите на то, чтобы издание «ЛезгиЯр» публиковало не только лезгинские новости?
Всего ответов: 674
Реклама
Реклама
ЛезгиЯр на Facebook
Партнеры ЛезгиЯр
Лезги литература
Статистика

Яндекс.Метрика

Наша Кнопка

Онлайнда авайбур: 5
Мугьманар: 3
Иштиракчияр: 2
leggi, tariverdiev

Сегодня нас посетили: