Поэзия Миграгъ Къемер

Кузава, лагь, гум акъатиз

Дагъларилай элкъвей рекьер
Кьуру я, лагь, къум акъатиз;
КIани ярди хабар кьуртIа,
Кузава, лагь, гум акъатиз.

Яхул пата цав рахазва,
Гурвадалди акадна хар;
Зун Султали суьргуьннава
Пак тир хипиз, я чан вахар.

Шалбуздагъдин кукIвал цуьквер,
КукIвал цуьквер – кIанел хьанач.
Бязибуруз бахтар гурла,
Зун гъуцарин рикIел хьанач.

Я чилни цав, я чилни цав,
Цавал алай ракъар-варцар.
Кьисмет тежер рушни гада
Куьз халкьна бес, я чан гъуцар?!

Авач рикIихъ зерре сабур,
Са шем тиртIа, туьхуьдай зун:
ТавунайтIа элди айиб,
И дуьньядай хъфидай зун.

Зун бейкеф я дуьньядикай
Ганавай заз и дар ери:
КIевевай къуз чара тахьай
Зи душманар я куьн вири.

Кьакьан дагъдай кьван аватуй
Жуьнейд шейхда акьадайвал,
Ирид цавай цIай аватуй
Шихмурад заз тахквадайвал.

Шумуд тахта чил дигида,
Са къизилгуьл цуьк паталди?
КьетIиндиз зун гумир, буба,
Агъзур гьерни ник паталди.

Дагълар кьакьан хьана лугьуз,
Яд фидани бес лиледай,
БацIни кьетIин бул я лугьуз,
АкъучIдани чун дуьнедай.

Тавханадин кьулак кувай
КуькIвер къене ифей маша,
КIанибуруз тахтай рушар,
Куьн кIаркIуч кьаз зи патав ша.

За лугьуда, куьн ишехьа,
Миграгъ Къемер язва мазан.
Гъил куьчебан жеда экъвер,
Амачирла кIвални хизан.

Кьакьан синел акьахдайла,
Пеле кьадай гар я вун зи.
РикI, лепе хьиз, алахьдайла,
ЧIалар патал чар я вун зи.

Вуна чарар кхьенайтIа,
КIелдай хьи за накьвар кIвадриз.
Ви сес япуз хтанайтIа,
Къекъведай хьи ахвар квадриз.

Дуьне лацуз аквазвай хва,
Вун хьтинбур сад туш эхир.
Бахтуникай рахазвай хва,
Бахт булахдин яд туш эхир.

Хъуьрез-хъуьрез залди къведай
Ви кьве вилин экв хьурай зун
Са нин ятIа яр жедалди,
Дили хьана, тек хьурай зун.

Лугьуз-лугьуз залди атай
Ви манидин чIалаз кьий зун.
Чун кьвед, зи яр, сад тахьайтIа,
Ви манияр галаз кьий зун.

РикIевайди талгьайтIа, яр,
Мазан Къемер хьанач хьи зун.
Ви тIалдикай хабар тежез,
Къайи къван яз ханач хьи зун.

Ишехь, Къемер, чуьнгуьрд симер

Акьала вил – акIана рагъ,
Алатна зи жегьил тир чагъ;
Фена чина авай шафагъ.
Ишехь, Къемер, чуьнгуьрд симер.

Япалухдин къармахда нуькI
Гьатна, гила гьал хьурай гьикI?
Аман, зи рикI я хьи гъарикI!
Ишехь, Къемер, чуьнгуьрд симер.

Хьанва гила эхир-пехир,
Югъ я няни: тIая нехир?!
Шихмурадаз я вун чехир.
Ишехь, Къемер, чуьнгуьрд симер.

Хьанач ваз бахт и дуьнеда,
Сад – балкIандал, сад – пияда.
Ви цуьл амач хьи таяда,
Ишехь, Къемер, чуьнгуьрд симер.

Аюх яни, им са ахвар, -
Гъавурда тур зун, чан вахар.
Вили кIвадриз рикIин накъвар,
Ишехь, Къемер, чуьнгуьрд симер.