Стихи. Хуьруьг Тагьир (Хурюгекий Тагир).


Диде

Эгер вуна ханачиртIа,
Жедачир зун пашман, диде!
Бахтсуздаказ зун дуьньядиз
Вучиз гъана, думшан диде?

Са гьафте я, туш им гъибет
Авачиз зун шалвардин мет.
Йифди-югъди къачуз зегьмет,
Чан гуда за гьикьван, диде?

За гьикьван къачуда кашар,
Инсандивай эхиз тежар?
Чпи неда ягълу ашар,
Заз фуни гуч яван, диде!

Амай крар эхдай вири –
Динж туш йифиз къаткур ери,
касни авач валай гъейри
Къведайди гьич зи ван, диде!


Я кас

Минет авуналди пара
Гьич зи гафар хьизни, я кас.
Бегьер тагур цIвелин тара
Ширин майва гъизни, я кас?

Мергьямятсуз, мискьи, кIеви,
Фикир гьакьван чIуру я ви.
Зилиди хьиз хъвана иви,
Кьиникь яни видни, я кас?!

Гардан яцIу, руфун еке,
Инсаф авачир са тике,
Истисмариз халкьар икI на
Чан тушни бес чидни, я кас?

Етим хьиз ви гьалтна гъилел,
КIвачел алачиз, я кьилел,
Пуд суз хьана зун ви кIвалел –
Тух хьанач са кIусни, я кас.

Инсан са гьайван хьиз кьуна,
Къаткур ийиз йифиз тIуна,
Залумдин хва, кIусни вуна
Инсаф рикIел гъизни, я кас!

Рахадай кьван ви кьуьзуь паб,
Хьана хьи зи жигер кабаб,
Хуьруьг Тагьиран и азаб
Гьич рикIелай физни, я кас!


Файдадиз

Фагьумайда, и дуьньяда
Валай пис шеъ авач, файда,
Къачурда вун аслан хьтин
Итим жеда яваш, файда.

Эгер гьатайтIа гъиле буш,
Экьреб хьтин алатдай туш,
Я вах хутхуз, я вуна руш,
Я вун гьахьтин къаркъаш, файда.

Залукда таз хъсан чилер,
Кесибриз я вун лап зегьер,
ЧIурна нече-шумуд кIвалер,
Авуна на тараш, файда.

Винелди къвез гьар са йикъан,
Са дагъ жеда вакай къакъан,
Мухтасар яз вун амай кьван
Халкьдиз са экв аквач, файда.

Тагьираз акунач гила
Валай еке агъур шала,
Туба хьуй вун мад за кIула
Къенлай кьулухъ кьадач, файда.


Такабур дагълар

Куьне садра ая сабур,
Сад-садалай кьакьан дагълар.
Кьил цава кьуна такабур
Ше жемир куьн акьван, дагълар.

Гьар са затI хьайила битмиш,
Техйиз дуьз аранар саймиш,
Гуьзел чуьлдин къачуз къаргъиш
Хьунухь дуьз туш, яман дагълар.

Ванер къвезва чаз цав рахар,
Пис жемир куьн, яда квез хар.
Къене пад цIай, къванер, чархар
Я куь эсил макан, дагълар.

Гьарда вичи вич кьаз артух,
Гагь акъатда къати саврух,
Тамар-тарарин ша язух,
Акъудмир и тIурфан, дагълар.

ЧIуриз акурвалди куь чин,
Къачуд шалта гьарда вичин,
Халкь арандиз жеда кIвачин,
Амукьда куьн яван, дагълар.

Мисал ава чахъ лап еке,
Квезни техьана жеч белки:
Туьнт хьайитIа къапун сирке,
Тирди чир хьухь зиян, дагълар.

И гаф лагьай Хуьруьг Тагьир,
Вуч ятIа лагь ви фикир,
Фагьум ая эвел-эхир
Гьарма сада жуван, дагълар.


Дидедин гьал пис туш

Пара пис туш чи гьал, диде,
КIвал ава чахъ сач авачир.
Хзан – къалин, тIуьнни – пара,
ХъуьтIуьн бегьем раж авачир.

Чин чIур мийир, эй бейниван,
Чирна рахух тахсир жуван.
Гьинай гъида ягълу-яван?
Фу нез тахьуй къач авачир.

Садни авач къведай язух,
Чайдин бедел къайи яд хъухъ.
Са касдизни къенлай кьулухъ
Лугьумир чахъ тIач авачир.


Са руша дурнадиз

Ваз лугьудай са гаф ава,
Къваз са гъвечIи, азиз дурна,
Захъ дердияр гзаф ава,
Твах зи метлеб кьилиз, дурна.

Зун я хесте, вун я Лукьман:
Зи дердиниз ая дарман.
Зи ширин чан ида къурбан
Вун физ авай рекьиз, дурна.

Зи яр гала Шеки патахъ,
Вуна адаз саламар твах.
Туна гъиле авай кIвалах,
Фад хъша лагь хуьруьз, дурна.

Бахтлу хьуй ви яргъал сефер.
Адахлидин тIвар я Жафер.
ЧIуру я лагь Сунад кефер,
Тапшурмиша кIевиз, дурна.

Аманат хьуй зи гафар ваз.
Къваз тавуна хтурай фад,
Гужуналди зун масадаз
Гузава лагь гъуьлуьз, дурна.
Лента новостей
ОПРОС
Кто из этих национальных героев больше всего повлиял на ход истории?
Всего ответов: 1057
ЛезгиЯр на Facebook
Партнеры ЛезгиЯр
Лезги литература
Статистика

Яндекс.Метрика

Наша Кнопка

Онлайнда авайбур: 24
Мугьманар: 24
Иштиракчияр: 0


Сегодня нас посетили: