Поддержим Лезгинский бизнес
Лента новостей
ОПРОС
Как Вы сморите на то, чтобы издание «ЛезгиЯр» публиковало не только лезгинские новости?
Всего ответов: 691
Реклама
Реклама
ЛезгиЯр на Facebook
Партнеры ЛезгиЯр
Лезги литература
Статистика

Яндекс.Метрика

Наша Кнопка

Онлайнда авайбур: 32
Мугьманар: 31
Иштиракчияр: 1
Migraghvi

Сегодня нас посетили:

 
Главная » 2014 » Май » 8 » Игитдин хуьре шадвилер

18:10
Игитдин хуьре шадвилер

Игитдин хуьре шадвилер Игитдин хуьре шадвилер Игитдин хуьре шадвилер Игитдин хуьре шадвилер Игитдин хуьре шадвилер Игитдин хуьре шадвилер Игитдин хуьре шадвилер Игитдин хуьре шадвилер Игитдин хуьре шадвилер Алай йисан 3 ва 4-майдиз Кьурагь райондин КIирийрин хуьре Советрин Союздин Игит Эсед Салигьован экуь къамат эбеди яз рикIера хуьниз бахшнавай мярекат ва волейболдай республикадин турнир кьиле фена. Игитдин ватандиз республикадин жуьреба-жуьре пипIерай хейлин мугьманар атанвай. Нисинин сятдин 12-даз атанвай мугьманар, Э. Салигьован тIварунихъ галай школадин аялар, гъилера цуькверни ЧIехи Гъалибвилиз талукь плакатар, лозунгар аваз, хуьруьн центрадал, Игитдин бюст авай паркуна кIватI хьана. Шадвилин митинг хуьруьн юкьван школадин директор Фарман Шихкеримова ачухна:

- 1940-йисуз Яру Армиядин жергейриз эвер гайи Эсед Салигьов Томскда авай пехотадин Белоцерковский училищедиз рекье туна. 1941-йисуз агалкьунралди училище акьалтIарай кьегьал дагъви, Ватандин азадвал хуьз, душманриз акси женгиник экечIна. 1943-йисан эхиррай адахъ, женгера къалурнавай жуьрэтлувилерай, Яру Пайдахдин, Ватандин ЧIехи дяведин 1-дережадин, Александр Невскийдин орденар, «Жуьрэтлувиляй» медаль авай.



1944-йис батальондин командир Э. Салигьова ва адан регьбервилик квай аскерри Псковдин мулкарал къаршиламишна. 15-январдиз 30 аскердикай ибарат отрядни галаз майор Эсед Салигьов душмандин далу патаз гьахьна. Абурулай ракьун рекьерин чIехи метлеб авай Дно-Новосокольники магистраль кьатIиз алакьна. РикIе душмандиз фенд кьадай къаст авай Э. Салигьова, мадни вилик фена, Заболотье хуьре авай душмандин пехотадин полкунин штаб кукIварна. Немсерин къуватар къвердавай артух, Э. Салигьован отряд зайиф жезвай. Къати женг физвай арада отрядди 200-дав агакьна немсер къирмишна ва хуьр тамамдиз душмандикай азадна. Немсерив алава къуватар ахгакьна. Салигьован отрядда анжах 10 кас женг тухудай гьалда амай. Абур элкъвена душмандин кьушунри гьалкъада кьуна. И женгина Э. Салигьовал залан кьве хер хьана. 17-январдиз медсанбатдиз тухудай рекье ада чан гана.



Душмандихъ галаз кьиле тухвай женгера акьалтIай викIегьвални кьегьалвал къалурунай, Эсед Бабастанович Салигьоваз 1944-йисан 4-июндиз СССР-дин Верховный Советдин Президиумдин Указдалди, Советрин Союздин Игит лагьай тIвар гана. Кьейидалай кьулухъ. Адан экуь къамат ва тIвар чи рикIерай садрани акъатдач, - лагьана Ф. Шихкеримова.



Шадвилин митинг «Кьурагь район» МО-дин кьил Замир Азизован рахунри давамарна:

- Мярекатдин гьуьрметлу иштиракчияр, багъри мугьманар! Вахтуни чун къвердавай Ватандин ЧIехи дяве хьайи йисаривай яргъаз акъудзава. Душмандихъ галаз кьиле фейи женгер Ватан патал чIехи имтигьандиз элкъвенай. Анай чун вири четинвилериз дурум гана игитвилелди, кьегьалвилелди экъечIна. Ватандин ЧIехи дяведин йисара 11 агъзурдав агакьна чи ватанэгьлийрикай Советрин Союздин Игитар хьана. Абурун арада 58 дагъустанвини ава. Къе чун Советрин Союздин Игит, кьегьал хва Эсед Салигьов дидедиз хьайидалай инихъ 95 йис тамам хьун къейд авун патал кIватI хьанва. За квез виридаз и югъ рикIин сидкьидай тебрикзава. Зи мурад гьар са дагъустанвидихъ чандин сагъвал, рикIин шадвал хьун я. Къуй турнирдани викIегьбур гъалиб хьурай, - къейдна З. Азизова.



Гъуьгъуьнлай Игитдин хтул Гьажимурад Омарова, Гумбет райондай атанвай мугьман, турнирдин судья Мегьамед Къурамегьамедова кIиривийриз лезги чилел кьиле физвай сувар мубаракна.

Э. Салигьован тIварунихъ галай школадин аялри ва хуьруьн бахчадин тербиячийри Игитдиз бахшна кIелай шиирар мярекатдин иштиракчийри иллаки хушдиз кьабулна.

Игитдин гуьмбетдал цуьквер эцигайдалай кьулухъ мярекатдин иштиракчияр волейболдай акъажунар тешкилнавай майдандал фена. Игитдин ватанда 42-сеферда тешкилнавай турнирда цIинин йисуз Буйнакск, Шамил, Хунзах, Хив, Табасаран, Ахцегь, Сулейман-Стальский, Кьурагь районрин командайри иштиракна. Приздин фонд 300 агъзур манатдиз барабар тир.



Кьурагь райондин администрациядин физкультурадин, спортдин ва жегьилрин крарин рекьяй отделдин начальник Рамиз Рамазанова хабар гайивал, Кьурагь район Кьиблепатан Дагъустанда спортдай республикадин дережада аваз виридалайни гзаф серенжемар тешкилзавай чка я.



– ЧIехи Гъалибвилин сувариз талукьарна цIи ина спортдин кьуд турнир кьиле тухузва, - лагьана Р. Рамазанова.

– Волейболдиз иллаки кьетIен фикир гузва. Гьавиляй спортдин и жуьредай Кьурагь райондин команда республикада хъсанбурукай сад яз гьисабзава.



Э. Салигьован турнирдизни республикада фадлай машгьур хьанвай командайриз теклифнава. Гьар йисуз турнир цIийивилералди тафаватлу хьуниз чна кьетIен фикир гузва. И сеферда турнирдин иштиракчияр патал КIирийрин хуьре ачухнавай спортдин школа-интернатда къулай шартIар тешкилнава, - алава хъувуна Р. Рамазанова.



Гьава чIур хьун себеб яз волейболдай акъажунар хуьруьн спортдин школа-интернатдин спортзалда давамарна. 4-майдиз турнирдин нетижаяр кьуна. Финалда Кьурагь ва Шамил районрин командаяр гуьруьшмиш хьана. ЦIи гъиляй-гъилиз къведай Кубокдин сагьибар 1-чка кьур Кьурагь райондин волейболистрикай хьана. Командадиз 70 агъзур манат пул, медаларни дипломар гана. 2-чка къазанмишай Шамил райондин команда 50 агъзур, 3-чка кьур Хунзах райондин команда 30 агъзур ва 4-чкадал акъатай Табасаран райондин команда 10 агъзур манатдиз, медалризни дипломриз лайихлу хьана.



Турнирда иштиракай амай командайриз 5 агъзур манатдин кьадарда аваз пулдин премияр гана. Пулдин пишкешриз гьакIни судьяяр ва акъажунра тафаватлу хьайи кьилдин спортсменарни лайихлу хьана.

Мегьамед Ибрагьимов «ЛезгиЯр»-диз




Ниже приведены схожие материалы:

Похожие новости по теме:

Категория: Лезгины в России | Просмотров: 1806 | Добавил: Редактор | В материале упоминаются: лезги чIал, Мегьамед Ибрагьимов
Оставьте свой комментарий!
avatar