Юбилеяр райадминистрацияда къейдна

1 ноябрдиз республикадин медениятдинни тарихдин маарифдин сад тир йикъан сергьятра аваз Докъузпара райондин администрациядин актовый залда активдин собранидал республикадин дережада авай кьетlен кьве юбилейдиз – Дагъустан республика Россиядик акьалтlай гьалда акатайдалай инихъ 200 йис тамам хьуниз ва Дагъустандин халкьдин тlвар-ван авай шаир Расул Гьамзатов дидедиз хьайидалай инихъ 90 йис тамам хьуниз талукьарнавай шад мярекатар кьиле фена. Мярекатда РД-дин Президентдин контрольно-финансовый управленидин начальникдин заместитель Н.М.Омарова, ДГУ-дин Россиядин тарихдин кафедрадин профессор М.Ш.Гьуьсейнова, райондин идарайринни тешкилатрин жавабдар къуллугъчийри, муаллимри ва хейлин масабуру иштиракна.

Юбилейриз талукь тир активдин собрание «Докъузпара район» МО-дин кьил Керимхан Абасова тебрикдин хуш келимайралди ачухна. Ада Дагъустан Россиядик акатайдалай инихъ 200 йис тамам хьунин ва Расул Гьамзатован 90 йисан юбилейдин мярекатар санал кьиле тухунихъ авай важиблувиликай, Р.Гьамзатован юбилеяр уьлкведин хейлин шегьерра гурлудаказ къейдзавайдакай, адан эсерар неинки чи уьлкведа, гьакl къецепатан уьлквейрани хушвилелди кьабулзавайдакай лагьана. 

Москвада чlехи шаирдиз памятник ачухунин шад мярекатда РФ-дин президент В.В.Путина, РД-дин президент Р.Г.Абдулатипова иштиракна. Гьелбетда, и кардини адан машгьурвал успатзава. Райондин регьберди Москвада Кремлдин дараматда кьиле фейи Р.Гьамзатован 90 йисан юбилейдин гурлу мярекатдал Р.Абдулатипова авур рахунарни рикlел хкана. Гьа са вахтунда 4-ноябрдиз къейдзавай Халкьарин садвилин сувариз талукь яз райондин сергьятра жуьреба-жуьре мярекатар кьиле тухудайдакай, кьилди къачуртlа, спортдин акъажунар, райондин медениятдин маканди тешкилуналди концертар кьиле тухун кьетlнавайдакай лагьана.

Сифте гаф РД-дин Президентдин контрольно-финансовый управленидин начальникдин заместитель Н.Омароваз гана.

- И йис юбилейралди девлетлуди я: Дагъустан Россиядик экечlайдалай инихъ 200 йис, Дагъустандин халкьдин шаир Р.Гьамзатов дидедиз хьайидалай инихъ 90 йис, Дагъустандин халкьдин шаир Хуьруьг Тагьир дидедиз хьайидалай инихъ 120 йис ва масабур, - лагьана Н.Омарова. – Вирида республика вилик финин месэлайриз фикир гана кlанзава. Масадан чlуру ниятриз, миллетбазрин макьсадриз манийвал гуналди, дуствилин алакъаяр мягькемарун герек я. РФ-диз вичин составдик акатзавай субъектар вири сад я. Ина хайи-тахай авач. Чаз аквазва хьи, гьам экономикадин, гьам маса хилерин жигьетдайни президент кьиле аваз чи республикадин гьалар гуьнгуьна хутазва…

Активдин собранидал хейлин йисара ДГУ-да зегьмет чlугвазвай профессор, тарихчи Межид Гьуьсейнова республикадин тарихдикай, ам Россиядик акатуникай галай-галайвал ихтилатна.

- Дагъустан Россиядикай чара авуникай рахазвайбур, чlуру ниятралди таблигъат тухузвайбурни авачиз туш, - лагьана профессорди. – Амма миллетбазвилин тах квай ихтилатри абадвал гъин тийидайди кьилин ксариз, гьукумдарриз чизва.

Гуьгъуьнлай мярекатдал райондин информационный технологйрин отделдин регьбер Акиф Баликишиев, райондин «ЭС» газетдин хсуси мухбир, шаир Шагьбала Шагьбалаев рахана.

- Алай йисуз РД-дин президентдин къарардалди Р.Гьамзатован 90 йисан, Х.Тагьиран 120 йисан юбилеяр къейдзава, - лагьана Ш.Шагьбалаева. -Ихьтин мярекатар кьиле тухун – халкьарин дуствилин лишан я. Расул Гьамзатов Нобелевский премиядиз лайих авай камаллу шаир я. Лезги эдебиятдин ялавлу векилар тир Алирза Саидова, Межид Гьажиева, Ибрагьим Гьуьсейнова, Шихнесир Къафланова, Мердали Жалилова, Арбен Къардаша ва масабуру хьиз, Расулан эсерар зани лезги чlалаз таржума авунва.

Шаирди шаирдин яратмишунрикай авур ихтилатар, кlелай таржумаяр залда ацукьнавайбуру гурлу капаралди кьабулна.

Райондин МО-дин кьил К.Абасова атанвай мугьманриз, залда кlватl хьанвай жемятдиз чухсагъул малумарайдалай кьулухъ вири концертдиз тамашиз медениятдин багъдиз фена. Райцентрада гьевескар манидарри кьиле тухвай концерт гзаф вахтуналди давам хьана.