Касдин гаф

Азербайджандин сейли художник, вич Дагъустандин Ахцегь райондин Чепер хуьряй тир Дарвин Велибекован чIехи буба Вилибег Дагъустандиз ва Азербайджандиз машгьур лезги карчи тир. Адахъ Набрандин тамара чIехи карханаяр авай. И савадлу, зегьметдал рикI алай, хъсанвилерихъ ялдай, шаирдин рикI авай касдин Чепердал алай чIехи дарамат халисан сенятдин эсер тир.

Адан ракIарин къаншардал кьве чIехи аждагьандин гуьмбет алай, къен ва къеце пад къимету натюрмортралди, декорацийралди, марагълу витражралди,айнадин сталактитралди туькIурьрнавай кIвализ килигиз XIX виш йисан эхирра Дагъустандин чилерал атай сиягьатчияр,алимар, къелемэгьлияр къведай. Велибег вичихъ шаирвилин тIебият, художниквилин алакьунар авай, гьахъ вине кьадай инсафлу ва нуфузлу касс тир.

Вилибеганни Азербайджандин сейли миллионер Гьажи Зейналабдин Тагъиеван арада яргъал йисаралди давам хьайи дуствилихъ марагълу тарих ава. Садра дуьшуьшдай Гь.З. Тагъиев Вилибеган Набранда авай кьуларин карханадиз къведа ва вичиз инай гьазур кьулар къачуз кIанзавайди малумарна. Ингье Вилибега абур са маса касс патал гьазурнавайди я лугьуда.

ИкI хьайила миллеонерди адаз кьведра артух пул теклифда. Вилибега им мумкин туширди, вичи касдиз гаф ганвайди тикрарда. Гьажи Зейналабдина вич вуж касс ятIа чирда ва Вилибегаз вадра артух пул теклифда. Вилибега и гъилера кьетIидиз лугьуда «Завай касдиз гайи гаф чIуриз жедач». Гь.З. Тагъиев мад са гафни талана хъфида.

Муькуь юкъуз вичин файтонда аваз Набрандиз хтай миллионерди Вилибегав са чар вугуда. «Им вуч я, Гьажи?-лагьана хабар кьада Вилибега». «Ви къуншидал алай тамун документ я, им заз вичин гафнии кар сад тир халисан хозейиндиз пишкеш ийиз кIанзава» лагьана ада ордер Вилибегав вугуда.

Гьа чIавалай абурун арада башламишай дуствал 1924-йисалди давам хьанай. Миллионер рагьметдиз фейила, Вилибег сибирдиз суьргуьн авунай ва ада гьана вичин дуьнья дегишарнай. Адан тахсиррикай садни «миллионердихъ галаз дуствал авун» тир.