Стихи Лезги Нямет

Шагьнабат

Дагъларин къуьнерлай нек хьиз алахьиз,

Бахтавар булахрин церик какахьиз,

Бегьер гваз багъларин къужахда гьахьиз,

Къвезва вун чуьлда ван туна, Шагьнабат.

Чиз верцIи тир дад

Салариз фад-фад

Гузва а ви яд

Чина, Шагьнабат.

Зегьметдив диганвай мублагь никIера,

Дашлудин кIамара, суван кикера,

Ашкъидив ацIанвай гумрагь рикIера

Къунва хас тир чка вуна, Шагьнабат.

Ви ван я азиз

Гьар садан рикIиз,

Чпин рикIер хьиз

Чина, Шагьнабат.

КцIар вацI тIвар алаз хъсан я чаз вун,

УрусризВволга хьиз масан я чаз вун.

АцIура багъларив тала, тIул, дугун,

Самурдин гъил гъиле къуна, Шагьнабат.

Ша чун ая шад

Гьамиша хьиз мад

Ватандин азад

Ччина, Шагьнабат.

1960

Жедай туш

Вичиз рехъ чин тийирдивай

Масад рекье тваз жедай туш.

КIан хьуналди кьемкьердивай

Вечрен кака хаз жедай туш.

ТахьайтIа са аял себеб,

УстIарди гьич илигич кьеб.

Ухшар ятIан сад садаз чеб,

Уьрдегдикай къаз жедай туш.

Бубайрилай амай гаф я:

«Кар мукьуфдив, кьилив ая».

КIарасдикай ракьун пая,

Къалгъандикай таз жедай туш.

Рахадайбур гзаф цавай,

Яргъал хьана акъваз чавай.

Чпин гафар шаирривай

РикIин къене таз жедай туш.

1960

Меслят

Вилерив вилер диндирмишайдан

РикIикай хабар кьун хъсан я ваз.

Вун жерягь я ви патав атайдан,

Дердиниз дарман гун хъсан я ваз.

Уьмуьрдин рекьяй агагъна паяр,

Хиялдай ракъугъ танишар, таяр.

Жагъурна жуваз кIани тир са яр,

Гьисс кьилин геле тун хъсан я ваз.

РикIин вулкандал атай чIавуз звал

Фикир це, рекьер жуваз тахьуй сал.

Аял чIавалай ви ашкъидин цIал

ЦIрайдаз сагьиб хьун хъсан я ваз.

Яргъариз фимир, зи нефес, зи рикI,

Ширин билбилар тахьурай гъарикI.

Эвел ашкъидин ялавдиз килиг,

Ахпа лагь: даим зун хъсан я ваз.

1961

ГьикI тамашда?

ЧIарар сару, вилер цIару,

ПIузарар ал, хъуьхъвер яру,

Ви акунар хаму, хару –

Цуьк кармашда, урусдин руш.

Хуш экъуьнрин зиреквили,

Нуш луькIуьнрин герчеквили,

АцIай хурун гуьрчегвили

РикI тIарашда, урусдин руш.

Тек хал алай лацу гардан,

Гуьзел къамат, шумал буй, тан...

Заз акур туш икI маса тан

Гьич зи яшда, урусдин руш.

Магнитди хьиз жувал чIугваз,

Лугьузва на: килига заз.

Пел варз, сифет варз хьтин ваз

ГьикI тамашда, урусдин руш?

1964

Кана зи рикI

Аквадамаз зи вилериз,

Зи вилерик гъана зи рикI.

Гъил кьадамаз, ви вилери

ЦIай илисна кана зи рикI.

Вахчурла на къулухъ камар,

Ахкунач заз чуьллер-чамар.

Чанда гьатна къаяр-къамар,

Дагъдин мур хьиз, къана зи рикI.

Тахквадамаз рагъ хьтин вун,

Къай рикIемаз зай хьана зун.

КIанзамачир затIни ахкун,

Дуьньядикай хана зи рикI.

Амачиз са дарман-дава,

Чун кьведни къе са гьалдава.

Сагъар хъия гила жува,

РикIикай пай гана, зи рикI.

1970