Лента новостей
ОПРОС
Кто из этих национальных героев больше всего повлиял на ход истории?
Всего ответов: 1056
Поддержка проекта «ЛезгиЯр»
ЛезгиЯр на Facebook
Партнеры ЛезгиЯр
Лезги литература
Статистика

Яндекс.Метрика

Наша Кнопка

Онлайнда авайбур: 18
Мугьманар: 18
Иштиракчияр: 0


Сегодня нас посетили:

 
Главная » 2017 » Апрель » 13 » Ватандихъ цIигел яз

08:52

Ватандихъ цIигел яз


Ватандихъ цIигел яз
Мукьвара «Лезги газетдин» почтадиз атай чарчи зи фикир вичел желбна. Ана кхьенвай: 

— «Гьуьрметлу редакция! Квез чар кхьизвайди Урусатдин Екатеринбург шегьерда уьмуьрзавай са лезги я. Зун Азербайжан Республикадин Исмаил райондин КIелетI хуьре дидедиз хьана, бубайрин бинеяр Вини Къурушдилай я. Зи шиирар «Алам» журналдизни «Самур» газетдиз акъатнава. Жуван эсерар за куь редакциядизни ракъурзава, абурукай лайихлу яз аквазвайбур куьне газетдин чинал гъанайтIа кIанзавай….Гьуьрметдивди, Намик Ферзалиев».

Чар кIелайдалай кьулухъ, за, яргъал вегьин тавуна, «Къурушрин сес» газетдин электронный почтадай Намик Ферзалиеван тIварцIел адан эсил-несилдикай тамамдиз баянар чирун патал хабарар кьунвай чар ракъурна.

Намикан жавабди вич яргъалди вилив хуьз тунач. Са шумуд сят арадай фейила чи почтадиз ихьтин манадин чар хтана: 

— «Ваалейкум салам, Муса стха. Вуна заз чар кхьинал зун пара шад я. «Къурушрин сес» газетдихъ галаз алакъа хуьз кIанз зун пара алахънавай. Амма сакIани газетдин электронный почтадин адрес жагъизвачир. Зи миресар хайтакьар я. Дагъустандин халкьдин шаир Шагь-Эмир Мурадов зи бубадин ими я. Зи чIехи бубадин тIвар Хелеф я, бубадин тIвар – Камал. Хелефан буба Ферзалини Шагь-Эмиран буба Билал хайи стхаяр я. Зи фамилия Ферзали бубадилай атанва.

Зи чIехи буба жегьил яз Азербайжан пата авай лезгийрин аялриз дидед чIалан тарсар гун патал гьаниз ракъурайди я.

Зи 53 йис я. За Москвадин автомобилринни рекьерин институт акьалтIарнава ва алай вахтунда Екатеринбург шегьерда уьмуьрзава.

Шиирар за аял чIавалай кхьизва, анжах азербайжан чIалал. Кьве йис идалай вилик зун лезги чIалал кIелиз-кхьиз чириз эгечIна. Лезги чIалал заз рахаз чизвайтIани, кIелиз-кхьиз чизвачир. И кардин себебни ам тир хьи, зун чIехи хьайи хуьре уьмуьрзавайбур вири лезгияр тиртIани, чаз мектебда лезги чIалан тарсар ганач…».

Намик Ферзалиева чи тIалабуналди газетдин почтадиз вичин къелемдикай хкатнавай са шумуд шиирни рекье туна.

Къейд авун лазим я, 50 йисан яшдилай алатайла дидедин чIалал кIелиз-кхьиз чир хъувунин къаст вилик эцигун - им Ватандихъ, дидед чIалахъ, санлай къачурла, жуван халкьдихъ ва адан милливилихъ рикI кузва лагьай чIал я. Намик Ферзалиеван рикI ватан кIан хьунин гьиссерив ацIанвайди адан къелемдикай хкатанвай эсеррай ачухдиз аквазва.

Мадни са алава: Намик Ферзалиев вичи вилик эцигнавай макьсаддив агакьнавайдал са шакни алач – хайи чIалал машгъул хьанвай и кьве йисан вахтунда адаз неинки кIелиз-кхьиз чир хьанва, гьакIни илгьамдин савкьатар тир вичин фикирар-хиялар шииррин кIалубра твазни хъсандиз алакьзава. Имни Намик Ферзалиев дидед чIал, адан ширинвал лап рикIивай вичин бейнидик кужумиз алахънавайди успатзавай делил я.

Агъадихъ чна Намик Ферзалиеван са шумуд шиир «Лезги Яр» сайт кIелзавайбурун фикирдиз гъизва.

Муса Агьмедов, «Къурушрин сес» газетдин кьилин редактор, «Лезги газетдин» кьилин редактордин заместитель.

Къуруш хуьр

Вакай булдиз лагьанай заз бубади:
«Дагъдин чинал вун нехиш я, Къуруш хуьр».
Тарифариз вичин хайи убадин,
Мецел алай са алхиш я, Къуруш хуьр.

Гатфарихъди яру цуьквер акъатда,
Живер цlраз, нурлу эквер акъатда,
Ви кукIушдал элкъвез лекьер акъатда,
Тlебиатдин са багъиш я, Къуруш хуьр.

Зун рехъ гьатна ви патарив атанвач,
Ярудагъдал зи кIвачи гел атIанвач,
Сас тlакьана, ви ятаркай за хъванвач,
Вун шикилрай заз таниш я, Къуруш хуьр.

Ацукьнава чеб синерал дагъларин,
Яйлахар я,чка туш кьван багъларин...
Вун макан я кlуфар хци рагарин
Цавухъ галаз ви гуьруьш я, Къуруш хуьр.

Къекъведай зун, атIудайвал вилихъай,
Жигъир кьуна, Нисин дагъдин кlанихъай.
Са вил вегьин Кикенсуван винихъай...
Вун мугьманрив лап вердиш я, Къуруш хуьр.

Ватандин яд дарман хьана

Начагъ бубад нефес гузва гужунал,
Агакьнава саки эхир - агь кьуна…
Мукьуз хьана, за лап япал жузуна:
«Рикlиз кlани шеъ аватlа, лагь вуна…».

Гьа легьзеда дуьз хъхьана тан, къамат,
ТIал-квал такваз, зайифдиз ам рахана:
«Вил галамаз рекьин тавуй, дад-бидад,
Къурушдилай жен са хупl яд хкана...»

Кьисмет я ман, са мирес-кар акl хьана -
Мугьман фена вини хуьруьз хквезвай.
Аян тир хьиз, са шуьше яд хкана -
Яд акуна, бубадин чин хъуьрезвай...

Агатна ам шуьшедавай савкьатдив,
Са геренда лап фикирри тухвана...
Ахпа нефес атlуз, вири къуватдив,
Шуьрбет хьтин Ватандин а яд хъвана.

Къерехдилай фагьумиз, пагь атlанвай
Бубадин гьал акваз за гъам чlугвазвай.
Хуьруьхъ цIигел, накъваривди ацIанвай
Адан вилер булах хьана ргазвай...

Им вуч кар я? КIанивал я Ватандиз!
Адан ялав рикIе даим куз жеда.
Вахт атайла гъурбатдавай инсанди,
Хайи накьвар рикIеваз чан гуз жеда…

Гатфар

Гатфар къвезва, вичин чими нефес гваз,
Ахъа жезва чилин чlагай дамарар.
Чlагунариз, акъвазнава гьазур яз,
Тlебиатни авудзава ахварай.

Акваз-такваз цlразава живерни,
Акъатзава винел чилин гачалар.
Ажуз хьанва кьуьд, кьан тийиз хивени -
Ам гатфари ярхарзава кlвачелай.

Агакьнава серт къаярин эхирар,
Чими бугъар хкаж жезва чилерай.
Малум жезва дар накьвадин жигъирар,
Кьуьд катзава а жигъиррин гелерай.

Цlразватlан са патахъай, амазва-
НикIин винел гьеле лацу халича.
Инлай-анлай сифте къацар аквазва,
Живед чиниз гузва къацу нехишар.

Экlя хьанва къецlил жезвай гуьнеяр,
Живед ятар авахьзава - шур гьа шур.
На лугьуди, им са цlийи дуьнья я -
Суфат амач тIебиатдихъ накь акур.

Амма дагълар, хвена чпин такабур,
Тади кьаз туш, лацу бармак хтуназ.
Акъудзавай хьиз синагъдай чи сабур,
«Хкведа кьуьд!», - гуя кичIе гузва чаз.

Хупlни иер, верцlи я и легьзеяр,
Муьгьуьббатди цlир ахъайдай рикlера.
Лугьуз кIанда: яшайиш вуч гуьзел я,
Садрани циф таххьурай чи рекьера.

Гатфар къвезва, атирар гваз ашкъидин,
Са суьгьуьрдин, аламатдин сегьне я.
Чка авач и сегьнеда нашидиз,
Экъечlрай - нин рикl гьевесрин дегьне я.







Ниже приведены схожие материалы:

Похожие новости по теме:

Категория: Лезгины в России | Просмотров: 2867 | Добавил: Jurnalist | В материале упоминаются: Муса Агьмедов, Алам журнал, Къурушрин сес, Намик Ферзалиева, Самур газет, лезги ч!ал

avatar
1
Вот и так возрождается даже на чужбине древний Лезги язык нам всем пример! Чуда! Даже стихи пишут. БАРАКАЛЛА! Пожалуйста как он эта делал в деталях расскажут через сайт. НАМИГ СТХА чехи агалгьунар квез ва куь хизандиз сагьламвал  шадвал АЛЛАХди ергьи уьмир гурай.
avatar
2
Сагърай гзаф,стха!Квезни бахтлу уьмуьрар гурай Аллагьди!
avatar