Мурадагъа Мурадагъаев - РикIел аламукьда

Азербайжандин илимди вичин лайихлу векилрикай сад квадарна. Мурадагъа Мурадагъаеван уьмуьр яргъалди фейи залан начагъвиликай  кьатI хьана. 1935-йисуз КцIар райондин ЦIехуьл хуьре дидедиз хьайи Му радагъаев Мурадагъа Султан мурадан хци ТIигьиржал хуьре  юкьван мектеб акьалтIарна,       

Азербайжандин Политехнический Институтда кIелна. Вичихъ чIехи алакьунар авай жегьилди инаг тафаватлувилелди кьилиз акъудна, Азербайжандин ИА-дин Гидротехникадин ва Мелиорациядин институтдин аспирантурадик экечIна. Москвада кандидатвилин диссертация хвена ватантиз хтай М.Мурадагъаева яргъал йисара Бакудин институтра муаллимвал авуна.

Техникадин илимрин кандидат М.Мурадагъаева залан грунтара сал хандакIар эгъуьндай машинрин теория гьазурна ва ихьтин машин арадиз гъана. Ада сал хандакIрин дренар эцигун патал технологиядин процессар механикадалди кьилиз акъуддай комбайнни арадиз гъана. И комбайнди СССР-дин Халкьдин Майишатдин Выставкадин буьруьнждин медаль къачуна. М.Мурадагъаева Азербайжанда сифте яз 1200 мм диаметрдин турбайра кIеви коллектор эцигдай технология гьазурна. Алимдин илимдин кIвалахрикай халкьдин майишатди миллион манатралди хийир къачуна.

М.Мурадагъаева цIудралди алимарни гьазурна. Абурукай кьведа республикадин комсомолдин премия къачуна. 100-дав агакьна илимдин кIвалахрин, кьве учебникдин, 7 методикадин ктабдин ва 5 ма-шиндин автор тир М.Мурадагъаева 1984-йисалай вичин уьмуьрдин эхирдалди Азербайжандин Архитектурадинни Эци-гунрин Университетдин доцентвиле кIвалахнай.

1992-2001- йисара ада «Самур» Лезги Милли Меркездин седридин сад лагьай заместителвиле, 2001-2007-йисара седривиле кIва-лахнай.

     

Азербайжандин илимдик  ва жегьил кадрияр кIвачел ахкьалдаруник вичин зурба пай кутур чи ватанэгьли, къени къилихрин  ватенперес инсан   Мурадагъа  Мурадагъаеван экуь къамат адан хайибурун, ярар-дустарин рикIелай алатдач. Аллагьди рагьмет авурай!