|
Лезги Салигь (XVII век)
Ухшар я
Ви гуьзелвал, Суна-дилбер,
Ракъиниз, вацраз ухшар я.
Гьелекмир зун вуна, дилбер,
Ваз цуькведин наз ухшар я.
Вакай фикир ийидай кьван
Кьил элкъвезва, хесте я чан.
Вун я, биллагь, пак тир жейран,
Манидиз аваз ухшар я.
Гуьрчег я ви яру пекер,
Ви бахчада – алван цуьквер,
ПIузар кьелечI, мез я шекер,
Бедендизни саз ухшар я.
Вал рикIивай ашукь я зун
Вун Лейли я, зунни Межнун.
Салигьан яр кIандай хьи вун!
Зи рикIин сес ваз ухшар я.
