Поэзия Мазали Али

Фатмадиз

Руьгьдин буйругъ акъудзава за кьилиз,
Аян я хьи себеб вазни, Фатма зи.
ДапIар кьисмет хьанва кесиб зи кIвализ,
Къвезмач мецел шад авазни, Фатма зи.

Ватандивай къакъатзавай субай яз
Азабрикай зи виждандиз хабар я.
Вун себеб яз гъуцари гай са пай я,
Гъамлу хьанва седеф сазни, Фатма зи.

Ви бубадиз муьтIуьгъ тежер гъил хьана.
Мал-девлетдал даим адан вил хьана.
Али физва, Ватан къайи чил хьана,
Туна элни, ярдин назни, Фатма зи.

Жемятдиз

Хейлин вахт тир ашукь тир чун рикIивай,
Амма кIеви цаз хьана чи рекьеллай,
КIани рушахъ галаз уьмьур тухудай,
Кесибвили рехъ ганач заз, жемятар.

Низ хабар тир кьве жегьилдин рикIикай,
Низ къайгъу тир хуьре и сес хьуникай,
Вилер акъат тийиз ярдин гуьгъуьнай,
Амазма зун кьурайди хьиз, жемятар.

Гьикьван кузва зун хьинбур чарада,
Фекьид, фалчи жерягьди, гьакI масада,
Юзбашидин зунжур гъиле авайда,
Яшамиш жез вахгузвач чав, жемятар.

Зилиди хьиз фугъараяр фитIиндай,
Муьфтехурар муч акъатда арадай,
Куьгьне-эксик адетарни тергардай,
Алидиз гьа югъ аквач жал, жемятар.

Жегьилриз тавакъу

ЯхцIур балкIан хьуй са жуьре,
Вири гьатна атуй рекье,
Къачудай хьиз Къубад къеле,
Зи дердиниз дарман атуй.

Хайи Ватан вилериз зи,
Пай таххьайтIа уьмьурдиз зи,
Хабар це фад эллериз зи,
Зун кьабулдай карван атуй.

Гъурбатда заз амач мумкин,
Гьарайдиз ша жегьилар куьн,
Акун патал къамат хуьруьн,
Зи багърияр мугьман атуй.

Алидин гьал чIуру я лагь,
Саз кьур гъилер кьуру я лагь,
Зун, Ватан, вал кьару я лагь,
ЯхцIур жегьил-жаван атуй.

Хандиз

Ханди чаз къе авуна кар,
Къуй виридаз хьурай хабар,
Алай пекер тирла кукIвар,
Кьилди кIвализ мугьман хьана.

Зал чухва-затI ала лугьуз,
Юкьва чIулни ава лугьуз,
Девлетлуд ни гала лугьуз,
Зун гьуьрметлу инсан хьана.

Зунни мирес, арада цал,
Хуш тир рикIиз куьн авай кIвал,
Куьн шад яни къенин йикъал,
Акатайдаз девран хьана.

Къугъвазмач зи сазунин сим,
Хандин кIвале тийир регьим,
Фикирдиз гъиз Мацарин ким,
Алини курпашман хьана.

Намерддиз

Эй инсанар, за квез ийин эрзи-гьал:
Гьиллени таб я гьар са кар намерддин,
Жигъич адан кIваляй са кIус фу гьалал,
Гьарамди я кIулавай пар намерддин.

Зимбил кIатI я, хуьрек мухан лаваш я,
Аллагьдиз негь, шейтIандиз ам юлдаш я,
ЯкIуз къимиш текъвез, кIараб кармаш я,
Терг хьуй сивяй вири сарар намерддин.

Намерддиз гьич куьмек ийиз кIан жемир,
Гьикьван ада гьарайтIан, ван жемир.
Ахьтиндакай дуст кьадай инсан жемир,
Кьезил тахьуй рикIин азар намерддин.

Гатуз яйлах, хъуьтIуьз къишлах кьаз макан,
Алахъда ам хуьз анжах вичин чан.
Кар я, кIвализ атун хьайитIа са мугьман,
Вилерилай фида накъвар намерддин.

Кьейилани таб алатдач мецелай,
Цацар кими тахьуй адан къецелай,
Байкъушдин ван яваш тежез варцелай,
Зулумат хьуй гадни гатфар намерддин.

Зун Мазали Али я, гьахъ рахада,
Фу балкIандал хьурай, намерд – пияда,
Са ягьсузни тамукьрай и дуьньяда,
Квахьдайвал чи нугъватдай тIвар намерддин.

Кесибвал

Лидин шалам, авунвачир вич табагъ,
Зи балкIанни, зи файтунни чан хьана.
Женнет лугьуз фейила зун Къарабагъ,
Заз кесибдин, кесибдиз зи ван хьана.

Гьар кесибдихъ стха ава – гишинвал,
Къулни ава гьафтейралди цIай тийир.
ГьикI ятIани хуьда ада эркинвал,
Мердвилелди авай са чIатI пай ийиз.

Геждал кимел акурди заз кесиб я,
Къариб мугьман агакьардай месивни.
КIатI ичIи яз инсанвилин сагьиб я,
Гьадаз я зи рикIин гафни весини.

Алидин хер къуй кьатIунрай кесибди,
Зи агь-аман гьадан япа ацукьрай.
Заз накьвадкай сур атIурай кесибди,
Зи саз, мизра гьадан гъиле амукьрай.