ТIагьиржалви Эмирали

ТIагьиржалви Эмирали (1790-1846)

Дурнаяр

Къифле-къифле алатдайла кьилелай,
Ван чукIура Дагъустандиз, дурнаяр.
ТIалаб ава захъ ийидай къе квевай,
Яб це куьне заз, жавандиз, дурнаяр.

ЭвичIа, ша са геренда зи патав,
Суьгьбет ая, гъурбатдавай сефилдав.
Минет я квез, фад туьхуьра цIай, ялав,
Аватнавай ширин чандиз, дурнаяр.

ЦIиргъи-цIиргъер хьана гьатна куьн рекье,
Акъвазнава беледчини куь кIвенкIве.
Квез акI жемир, дерт ава тек куь рикIе,
Хажалат хас я инсандиз, дурнаяр.

Зи кьилел, агь, гьикьван дуьшуьш атана,
Хажалатди зи рикIин кьил атIана.
И дуьньядин инсафсузвал кьатIана,
Лянетзава за деврандиз, дурнаяр.

Са вахтара зун лап кIубан, лап шад тир,
Гъамарикай, зиллетрикай азад тир.
Дуьньяд винел зун гатфар тир, зун гад тир,
Аватдалди и вирандиз, дурнаяр.

Заманада заз гьахъ-дуван жагъизвач,
Сабур гудай багъри инсан жагъизвач.
Зи дердериз дава-дарман жагъизвач,
Фад са хабар це Лукьманаз, дурнаяр.

Тараш хьана зи мал-девлет амукьнач,
Залан юкъуз патав садни гумукьнач.
Шукур хьурай, захъ гьич леке галукьнач.
Хал аватнач зи виждандиз, дурнаяр.

Зун Эмир я, заз чидай икI жедай чIал,
Кхьенвайди пелел, кьилел къведай чIал.
Нагагь рекье квез акуртIа ТIигьиржал,
Саламар лагь, зи ватандиз, дурнаяр.

Жагъурда

Мад цIийи хъижезва зи рикIин хирер,
Жуван хирериз за дарман жагъурда.
Есир яз гьатнава жаллатIдин гъиле,
За жув къутармишдай инсан жагъурда.

Аллагь, вун куьмек хьухь мерддин хва мерддиз,
Мерд инсан кIан жемир садран перт ийиз.
Вядеда за жаза ганач намерддиз,
Гьавиляй лукI хьана, султан жагъурда.

Эвелдай чир хьанач заз писни хъсан,
Гила намердринди хьанва и майдан.
Гьар тIебибдивай жеч дердиниз дарман,
Къекъвена за гьаким Лукьман жагъурда.

Эмиран бахтунин гъед куьз туьхвена,
Ви наздин хьелерик зи чан гелкъвена.
Хиялда умуддин цIелхем куькIвена,
Къекъвена за гьуьруь-гьилман жагъурда.

Лугьуз-лугьуз

Цуькведин дидардихъ гьесрет тир билбил
Шезва, гьинва гатфар, бар лугьуз-лугьуз.
Мансур хьиз зун акъатна тарагъаждиз,
Дуьнья куьз хьана заз дар лугьуз-лугьуз.

Сефилди галтайла юлдаш хбана зун,
РикIивайни адаз сирдаш хьана зун.
Гзаф хажалатрал дуьшуьш хьана зун,
Уьмуьрар хьана чаз пар лугьуз-лугьуз.

Сел хьиз акьуна зун рагара гьикьван,
Кана, хъукъвана зун цIаяра гьикьван.
Гьатна чилинани ракьара гьикьван,
Гьинва намус, гъейрат, ар лугьуз-лугьуз.

Зун хьиз кайид я шумуд виш инсан,
Дуьнья хьайиди я абуруз зиндан.
Фаргьад, Ширин, Лейли, Межнун туна чан
Ашкъид рекье, кьена яр лугьуз-лугьуз.

Вуна зун чандикай бизарна, Аллагь,
ЯтIани вун я тек Эмиран панагь.
Я Ребби, вуч ятIа зи тахсир, гунагь?
Жумни жагъанач заз, нар лугьуз-лугьуз.

Источник ©