БицIекриз лезги чIал кIанарзава

Лезги бицIекри дидед чIалал мультфильмдиз гьикьван рикI алаз килигдатIа фикир ганани куьне? Ахьтин фильмди дидед чIал тийижир аяларни чпихъ ялда. Абуру мягьтелвилелди, пагь атIанваз мультфильм чпин руьгьдиз кужумардайла чIехибурук руьгь акатда. Эхь, им гзафни-гзаф рикI ахъайдай, лувар акатдай кар я. Вуч хъсан я хьи, чи гележегдикай фагьумна аялар патал акьуллу проектар кьилиз акъудзавай лезги жегьилар арадиз атанва. И рекьяй «Леки» фондуни тухузвай крар иллаки рикIелай тефирбур я.

2016-йисалай инихъ и фондуни шумудни са мультфильм лезги чIалаз таржума авуна дидед чIалал рахурзава. И карда мукьувай иштиракзавайбурун тIварар гьуьрметдивди кьаз кIанзава чаз. Ингье абур: Омар Къазиханов, Асрет Ибилкьасумов, Вагьид Наврузбегов, Радмила Гьажибалаева, Эфрат Рамазанов, Рашид Гьасратов, Камила Шерифова, Мегьамедрасул Садыкъов, Куругъли Ферзалиев, Эмран Гьусейнов,​ Нарима Агьмедова, Назим Дашдемиров,​ Али Адилов, Руслан Мегьдиханов.

Къедалди 30 мультфильм аялрин ихтиярда вуганва. Дидед чIалал рикI алай чи ватанэгьлийривай тIалабун ам я хьи, агъадихъ ганвай линкдал илисна ана авай гьар са мультфильм мукьвал-мукьвал чпин аялриз къалуррай. Са чIавуз галайвал тавуна чпин веледриз дидед чIал чир тавур диде-бубайрини къайгъуни гьа фильмри чпин хивез къачуда. Ша и кардал хьайитIани чна кагьулвал тийин. Чи дидед чIалаз икьван икрам ийизвай, и къени проектдин винел датIана кIвалахзавай жегьилриз лагьайтIа, чна рикIин сидкьидай баркалла лугьузва.

Ша чун квез къалурин тIвар-ван авай Youtube каналар

https://www.youtube.com/@LezgiKim/videos

https://www.youtube.com/@LEZGINY/videos

https://www.youtube.com/@MegaART282/videos