Эльвинадин дуьнья

Сегьнедихъ авай гуж кьатIун патал Эльвинади манидал илигайла яргъалай адаз килигун бес я. ТIимил рахадай, инсанрихъ са акьванни агатдачир и руш са легьзеда акI дегиш жеда хьи! Чина мили хъвер аваз вичин манидин суьгьуьрда гьатда, иер легьзеяр бахшда инсанриз. И зериф руш акваз-такваз маниди акьван иерарда хьи, вил алудиз жедач адалай.

     

Зи ихтилат «Сувар» лезги ансамблдин маничи Эльвина Гьейдаровадикай я. ЦIуд йис я ада лезги мани вириниз сейли ийиз. Лезги халкьдин цIудралди манидиз цIийи уьмуьр гайи ада гьакIни зи цIудралди манияр инсанриз кIанарнава. Вичин гекъигиз тежер хьтин верцIи, кьа-кьан ванцелдини рикIиз чими акун-ралди гзаф инсанрин муьгьуьббат къазанмишнавай адахъ агъзурралди фанатар хьун дуьшуьшдин кар туш.

    

Зи рикIел хъсандиз алама, садра «Самур» газетдин редакциядиз Гуьл лугьудай са жегьил дишегьлини адан руш Эльвина атанай.

    

- Заз куьне Эльвинадин ванцихъ яб акална кIандай, - лагьанай дишегьлиди.

     

Юкьван мектебдин цIуд лагьай синифда кIелзавай яхун, гъвечIи руша Уьзеир Гьажибегован «Аршин мал алан» опереттадай Гуьлчегь-редин ария акI лагьанай хьи, адан ванцел къунши редакцийрай журналистар кIватI хьанай. Зи вилик акъвазнавай и лезги руш гележегда чи халкьдин сейли сеняткардиз элкъведайди шаксуз тир.

     

Чи танишвилелай ругуд варз алатайла, 2004-йисан гатфариз Эльвина Бакудин Шегьрияран тIварунихъ галай дараматда сифте яз сегьнедиз экъечIнай. «Гум, гум, зал къвемир» мани лагьай адаз залда авай 800 касди гурлу капаралди чпин разивал къалурнай.

2006-йисуз Азербайжандин Гьуку-матдин Операдинни Балетдин Театрда кьиле фейи «Суварин» 10-йисан юбилейдиз талукьарнавай концертда Эльвинади лагьай «Къаварилай къаваралди» манидиз а юкъуз виридалайни гзаф капар янай.

2009-йисан 5-майдиз Туьркиядин «TRT Avaz» каналдин теклифдалди чун 8 кас Анкарадиз рекье гьатнай. Вад макьамчидикайни кьве маничидикай туькIуьрнавай и гъвечIи группадикай «Ары» студияди са сятдин гунуг ганай. Туьркверин кьве сейли сеняткарди – Ирфан Гирдалани Фер-ял Башела завай жузун-качузунар ийиз, датİана лезги манийриз гаф гузвай. Зун ацукьнавай чкадилай сегьнедин кьулухъ пад хъсандиз аквазвай. Чи макьамар ягъайла, режиссеррилай операторралди вирибуру сад хьиз кьуьлерзавай. И кар акваз захъ хъвер акатзавай. Иллаки Эльвинади мани лугьудайла вири юзазвай.

     

Гьа нянихъ TRT-дин ресторанда чаз къунагълух ганай. Аниз кьилин режиссер Нигьат Гуьлер, режиссердин куьмекчияр Сибел Йолчу, Шегьла Бозкъурд ва маса гзаф инсанар атанвай. Абуру вирида «Сувар» ансамблдиз чпин разивал къалурзавай. Заур Мусаева кларнетдал ягъай макьамрикай, Решад Ибрагьи-мовани Эльвина Гьейдаровади лагьай манийрикай гзафни-гзаф хуш атанвай виридаз. Эльвинади лагьайтIа, абур гьейранарнавай. Виридаз адахъ датIана яб акализ кIанзавай. Лезги, азербайжан, туьрк, италян чIаларал манийрал илигнавай и билбилдиз кIвачел акъвазна капар янай вирида. Вилерал нагъв акьалтай Нигьат Гуьлера мягьтелвилелди завай жузунай:

     

- Икьван иер, икьван гужлу ван и яхун руша гьикİ акъудзава?

     

Эхь, цIуд йис я Эльвинади «Суварин» коллективдиз цIийи гьава гъана. ЦIуд йис я адан хъсан сура-кьар яргъариз акъатна. Бакудин, Москвадин, Ярославлдин, Санкт- Петербургдин ва маса шегьеррин чIехи сегьнейрал адан ван хьайибуру «им гьихьтин ван я?» лугьуз чпин гьейранвал чуьнуьхарзавач.

Авайвал лагьайтIа, вирт гудай чIижре хьиз галатун тийижиз алахъу-нар ийизвай Эльвинадихъ галаз манийрин винел кIвалахун халисан сувар я. Ада гьар са мани вичин рикIин, руьгьдин дегьнейрай акъудна чандал хкида. И руша чи кьуьлерунин коллективдихъ галаз санал кьуьлиз-кьуьлиз тамамарай манияр ансамблдин виридалайни хъсан нумрайрикай я.

     

Вичиз хизан туькIуьрунни рикIе-лай алуднавач Эльвинади. Вакъи-фахъ галаз санал Сария лугьудай руш велед чIехи ийизва абуру. Эльвина авай мярекатда лезги руьгь, лезги гьава жеда лугьуз гзафбуру адаз мел-мехъерикни эверда. Вичин сад лагьай альбом акъудун патал алахъунар авунни рикIелай алуднавач руша. ГьакIни кьилди концерт гун вичин мурад тирди чуьнуьхарзавач. И концерт адаз «Суварин» муькуь билбилрихъ – Жавагьир Абдуловадихъ, Жемила Заловадихъ ва Роза Гьажимурадовадихъ галаз санал, гьакIни ансамблдин чIехи коллективдин иштираквилелди тухуз кIанзава.

     

Гьа инал лагьана кIанда. Эльвинадихъ авай ван са маса халкьдин векилдихъ авайтIа, адаз цIудралди спонсорар жагъидай. Яраб чи халкьдихъ авач жал спонсорар? ХьанайтIа, лезги мани вири дуьньядиз сейли ийидай Эльвинади.