Куьмекдин свидетельство вахкана

ЧIехи Гъалибвилин 70 йисан сергьятра аваз Россиядин Президентдин 714 – нумрадин «1941-1945 – йисарин Ватандин ЧIехи дяведин ветеранар яшамиш жедай чкадалди таъминарун» Указдихъ галаз асаслу яз, алай йисан 8 – апрелдиз ЧIехи дяведа кечмиш хьайи ветерандин юлдаш Марият Музаферовадиз кIвал къачудай куьмекдин свидетельство вахкана.

Гьа и юкъуз Миграгъ – Къазмайрин хуьруьз М. Музаферовадин кIвализ УСЗН-дин начальник Эсед Арабов ва администрациядин кьилин заместитель Сурея Вердиханова мугьман хьана. Абуру Марият Гуьлалиевнадив Дагъустан республикадин зегьметдин ва яшайишдин жигьетдай тир министр Малик Баглиеван къул алай куьмекдин свидетельство вахкана ва чпин патай и лишанлу югъ тебрикна, чандин сагъвал, руьгьдин кIубанвал ва мукьвабурунни багърийрин патай яшлу инсандиз дикъет гун тIалабна.

Вичин патай М. Музаферовади, чеб хьтин яшлу инсанриз фикир гузвай, атанвай мугьманриз, райондин, республикадин ва гьакI гьукуматдин кьилериз чухсагъулар малумарна.