Къурушви руш — Москвада кьилин духтур

Ери-бине Къурушрин хуьряй тир Каширина Эльмира Агъа­селимовнади алай вахтунда Москва шегьердин аялрин 110-нумрадин поликлиникада кьилин духтур яз кIвалахзава. Къе чаз газ­ет кIелзавайбур адан уьмуьр­дин ва зегьметдин рекьихъ галаз танишариз кIанзава.

Къурушвияр тир Агъаселиманни Сиярадин хизанда дуьньядиз атай руша гьеле гъвечIи вах­тарилай духтурдин пешедикай фикирзавай. Гележегда би­цIек­рин сагъламвилин къаравулда акъвазун адан эрзиман мураддиз элкъвена. Гьа ихьтин къастуни ам Россиядин Н.И.Пирогован тIварунихъ галай госмедуниверситетдиз гъана.

2002-йисуз Эльмиради вуз «Педиатрия» пешекарвиляй яру димплом къачуналди акьалтIар­на. Вад йисуз шегьердин аялрин 71-нумрадин поликлиникадин кьилин духтурдин заместителдин везифаяр тамамарна. Гуь­гъуьнлай алакьунар авай пешекардал 110-нумрадин поликлиникадиз регьбервал гун ихтибарна. И къуллугъ кьегьал лезги ру­ша алай вахтундани намуслувилелди кьиле тухузва.

Лагьана кIанда, Эльмира Агъа­­селимовна кьиле акъвазнавай идара 2012-йисуз Москвада кьиле фейи «Формула жизни» фестивалда «Аялрин виридалайни хъсан поликлиника» номинацияда­ гъалиб хьана. Бажарагълу духтурдихъ «Неврология», «Рефлексотерапия» ва маса пешекарвилерайни махсус сертификатар ава. Э.Каширинади ме­ди­­ци­надин илимдизни кьетIен фи­кир­ гузва. И карди хъсан нетижаярни арадал гъизва. Мукьвара чи бажа­рагълу ватанэгьлиди медицинадин илимрин кандидатвилин диссертация агалкьунралди хвена.­

Жегьил алимдин къелемдикай хкатнавай илимдин макъалаяр чи ва къецепатан уьлквейрин кесерлу журналра чапнава. Вичини датIана международный конференцийра иштиракзава, пешекарвал хкажунал машгъул жезва. Медицинадин илимдиз талукь яз 2015-2018-йисара Эльмира Агъаселимовнади кхьенвай кIвалахриз Лондонда кьиле фейи международный са конференциядал хъсан къимет гана. Мадни башкъа, кар алакьдай духтурди Япониядин, Канададин, Франциядин, Израилдин медицинадин идарайрихъ галаз алакъаяр хуьзва, икьрарар ку­тIуннава.

Вичин патав куьмек кIанз атай гьар са кас ада рази авуна рахкурзава. Уьлкведин меркездин медицинадин алемдани адан тIвар гьуьрметдивди кьазва, гзаф месэлайрай адавай меслятар къачузва. Са гафуналди, къурушви руша, гьакъисагъвилелди зегьмет чIугуналди, еке гьуьрмет къазанмишнава.

Яргъал йисара медицинадин хиле кIвалахзавай Эльмира Агъаселимовна «Гиппократан кьинез вафалу хьунай», Н.И.Пирогован медалриз, Москвадин мэриядин, здравоохраненидин департаментдин патай шабагьриз лайихлу хьанва. Са шумуд йисуз адакай «Москва шегьердин виридалайни хъсан менеджер» конкурсдин гъалибчи хьана.

Эльмирадин рушани, дидедилай чешне къачуна, Н.И.Пирогован тIварунихъ галай госмедуниверситетдани кIелзава, тарсарилай кьулухъ Москва шегьердин са больницадани кIва­лах­зава.

Аферин лезги чилин кьегьал рушариз! Къуй дидедихъни рушахъ медицинадин хиле еке агал­кьунар, яргъал ва сагълам уьмуьрар хьурай!