Владик Батманов: «Лезги халкьдин хва я зун!»

Гьуьрметлу чи ЛезгиЯр сайтдин иштиракчияр, къе чна жегьил шаир Владик Батмановахъ галаз хьайи суьгьбет куь фикирдиз гъизва.

Жегьил шаир, публицист, ДГУ-дин ва социально-педагогический колледждин студент, Владик Нафирович Батманов 1995-йисан 16 октябрдиз Мегьарамдхуьруьн Хуьрелрин хуьре дидедиз хьана. Ам «Билбил» ктабдин кирам я.

- Владик стха, Куь къелемдикай хкатай сифте шиир квекай хьана? 

За жуван сифте шиир 2010-йисан декабрдин эхирдай кхьейди зи рик1ел хъсан алама. Къейд авуна к1анда хьи, зи сифте шиир вичи даим верц1и ванцел элдин гуьгьуьл хурам ийизва, бахтавар билбилдикай хьана. А шиир 2011 – йисан февралдин вацра чи райондин «Самурдин сес» газетда чапна. Лезги эдебиятдин диб кутур Етим Эминан ва дуьньядиз машгьур хьайи «ХХ – асирдин Гомер» Ст1ал Сулейманан сифте шииррни билбилдикай тир. Зун аламат я. Им дуьшуьшдин кар туш.

«Куьредин ярар» т1вар алай медениятдин маканда зи «Билбил» т1вар алаз улуб басма авуна. Ктабдин рецензия машгьур шаир-сатирик Сажидинан къелемдикай хкатна. Улубдин  редакторвал шаир Ахмедпаша Ахмедпашаева вичин хивез къачуна.Ктаб пуд паюникай ибарат я:

1 – «Шиир кхьихь, Владик!»

2 – «Муьгьуьббатдин вилаятда»

3 – «Багъшаза за»

Сад лагьай паюна ватанпересвилин, инсанпересвилин, т1ебиатдин темайриз майилвалзава. Кьвед лагьай паюна к1елчи муьгьуьббатдин гьиссерихъ галаз таниш жезва. Пуд лагьай паюна Дидедиз, шаирриз, ашукьриз бахшнавай эсерар гьатнава.

Ктабдиз «Билбил» т1вар гунин себеб ам я хьи, жуван сифте шиирни билбилдикай тир. И кар себеб яз за жуван улубдизни «Билбил» т1вар гана. Инанмиш я зун к1елчийри ктабдиз акъатнавай шиирар хуш кьабулунал.

Муьгьуьббатди гьар инсандин яшайишда кьет1ен роль къугъвазвайди шак алач. Муьгьуьббатдикай шиир кхьин тавур, адан т1ал дамарра къекъуьн тавур шаир дуьньядал бажагьат ала. И кар себеб яз, зи яратмишунрани бахтсуз ва бахтлувилин атир квай шиирри сирнавзава. Лагьана  к1анда хьи, заз даим бахтсуз темадиз хас тир шииррикай лезет гуда. Лагьай фикирдиз къуват яз лугьун хьи, «Ярдин т1ал», «Бахтсуз муьгьуьббат», «Эхиримжи гуьруьш», «Агата зав», «Зи яр», «Ярдин ният», «Сувун т1ула» ва маса эсеррин т1варар кьаз жеда. Анжах гуьрчег, яргъи кифери далу гатазвай лезги рушарин тарифар квай эссерар яратмишзава. Къуй бахтлу хьурай рик1е пак муьгьуьббат авай жегьилар. Аминь!

Эхь, ава захъ зи жегьил рик1из илгьам гъизвай руш (т1вар кьун кутугнаваз аквазвач заз) чуьнуьхдач за. Адан муьгьуьббатдиз хас тир шиирри зи яратмишунрин хазинада зурба чка кьазва. Гьатта,адаз бахшнавай «Муьгьуьббатдин ханум» т1вар алай цикл зи шииратдин вилаятда кьил цава кьуна къекъвезва. Ам хизандин чешнедиз диганвай руш я. Гележегда адахъ галаз хизан арадал гъунал зун Аллагьди гъидайди инанмиш я.

Азербайджан пата къелем хци, рик1 михьи лезги шаирар гзаф ава. А жергедик Вагиф М, Эйваз Г, Билал А, Сархан Я,Римма Гь, Лале С. ква лагьайт1а зун ягъалмиш жеч. Шаиррихъ галаз за интернет бинедалаз алакъа хуьзва. И мукьвара заз зари Вагиф Муьшкуьрвиди «Лезги поэзиядин антология» ктабдик вичи зи кьве шиир кутунвайди муштулух гана. Ихьтин муштулухри зи алакъадин сергьятар Азербайджан патан шаиррихъ галаз мадни гегьеншарзава.

Эхь,ийизва. Зи шиирар урус ч1алаз таржума авунал Гюзеля Гасанова, Бести Нифтиевв ва Сулейман Ахцегьви машгъул я. Заз абуруз пара кьадар сагърай лугьуз к1анзава. Абурувай зи гьиссер агакьариз жезва.

Лезги халкьдин хва я зун. Халкьдиз къуллугъ авун, жуван шииррал гуьгьуьл хурам авун зи кьилин ферз я. Завай шиир кхьин тавуна акъвазиз жедач эхир. Шиир  зи нефес я. «Шаир дуьньядиз шиирар гваз къведа» - лагьанай заз ч1ехи зари Эйваз Гуьлалиева. Дугъридани, кьел квай, гьакъикъи гафар я. Сагърай Вич! Ктаб акъудун шарт1 туш. Дерин,мана квай, к1елчидиз тагьсирдай шиирар арадал гъун гьам шаирдин кьегьалвал я. Заз исятда ктаб акъудунин рекье серфдай декьикьаяр авач. Аллагьдихъ умуд кваз 3-4 йисалай ктаб акъуддай ниятар ава захъ.

За алай вахтунда очно ДГУ-дин филфакдин 1 курсуна ва заочно социально-педагогический колледждин 3 курсуна жуваз чирвилер къачузва. Пешедин жегьетдай рахайт1а, захъ гьар жуьредин фикирар ава. Авайвал лагьайт1а, заз эвел жуван тержиба хкажун, жуван чирвилерин сергьятар гкгьенш авун зи алай вахтунда мурадни макьсад я. Амма гележегда гьихьтин пешедин иеси жедат1а чаз, гьелбетда, вахтуни къалурда.

Куьнни сагърай.