48 йисуз сегьнеда

Са тамашани Шихабдуллагь Къазанбиевичан иштираквал авачиз кьиле физвач. Яшарилай, къугъвазвай ролдилай аслу тушиз, тIебиатди бажарагъ ганвай актерди театрдин сегьнеда анжах са вичиз хас тирвал инанмишвилелди яратмишзавай къаматри тамашачияр гьейранарзава. 

- Гьи тамаша эцигиз хьайитIани, Ш.Закерьяев кутугай пек-партални алаз, вич къугъвазвай игитдиз ухшар гъана, сегьнеда пайда жеда. ИкI, актердин къаш-къаматди, адалай уьмуьрдин гуьзлемиш тийизвай хьтин гьакъикъат къалуриз алакьуни зун гьар сеферда мягьтеларзава, - лугьузва адакай театрдин режиссер, РД-дин халкьдин артист Мирзебег Мирзебегова. Актер жуьреба-жуьре къилихрин ва рикIел аламукьдай гзаф ролра къугъвана. Месела, Нажмудин Гоцинскийдин ("Дагъвияр” Р.Фатуев), Э.Капиеван ("СтIал Сулейман” З.Эфендиев, Б.Айдаев), Сурхайбеган ("Айдын” Ж.Жабарлы), Германан ("Къачагъар” Ф.Шиллер), князь Пантиашвилидин ("Ханума” А.Цагарели), Гьасанкъули-бегдин ("Мешеди ибад” У.Гьажибегов) ва масабурун. 

И аламатдин актерди А.Корнейчукан "Платон Кречет” тамашада сегьнеда арадал гъайи хирург Платон Кречетан къамат зи рикIелай садрани алатдач. КIани рушан бубадин уьмуьр къутармишиз тахьай "хирург” инсандин келледин къаматда авай ажалдихъ галаз векъидаказ рахазвай сегьне гзаф итижлуди хьанва. Ш.Закерьяев нин ролда къугъвайтIани, адан игитдай милли къилихар аквада: дуьзвал, ачухвал, мергьяматлувал, рикIин михьивал, яни, лугьудайвал, халис инсанвилин лишанар. Вири и ерияр актерди Хуьруьг Тагьиран ва Къияс Межидован "Ашукь Саид” драмадин игит, кесибвили, дарвили кIевера тунвай Аллагькъулидин къаматдалдини къалурзава. Артистдин пешекарвилин, сегьнедин устадвилин дережа йисандавай-йисуз хкаж жезва. 

Гьа икI лугьуз жеда ада вич сегьнеда тухузвай гьалдикайни, ачухдиз, фасагьатдиз рахуникайни. Шихабдуллагь Закерьяев хьтин бажарагълу, сегьне патал яшамиш жезвай ксар гьам театрдиз, гьамни обществодиз гьамиша герек я. 

- Зи уьмуьрдин рехъ хайи Лезги театрдихъ галаз алакъалу я. Ина зун жуван виридалайни хъсан ролра къугъвана. Гьа и сегьнеда тамашачидин кIанивал ва кIвалахдин рекьяй юлдашрин гьуьрмет къазанмишиз алакьна, - лугьузва актерди. Гьакъикъатдани, михьи, гьахълу, надир актердиз, насигьатчидиз-муаллимдиз ам чидай вирибурун патай чIехи гьуьрмет, авторитет ава. 

- Чи театрда Шихабдуллагь Къазанбиевич хьтин мергьяматлу насигьатчи, вичелай чешне къачуз жедай кас хьунал чна дамахзава, - разивилелди лугьузва актер Казбек Думаева. Мукьвара бажарагълу, лайихлу артист Закерьяеван 75 йис тамам жезва. Ам классикадин жанрдин тамашайра къугъвазва. Ам чаз сегьнедилай гагь "Ашукь Саид” муздрамада Аллагькъулидин, "Периханум” мелодрамада Дильдар Пашадин, гагь аялар патал махара жуьреба-жуьре ролра къугъваз, тамашачийрин гуьгьуьлар шадариз аквазва. Ш.Закерьяева гьам театрдин, гьамни Дербент шегьердин общественный уьмуьрдани активвилелди иштиракзава. 

Ам Лезги театрда РД-дин театральный деятелрин Союздин векил, худсоветдин член, шегьердин культурадин работникрин профсоюздин ревизкомиссиядин председатель я. Театральный искусство вилик тухунин кардик лайихлу пай кутунай 1978-йисуз актер СССР-дин культурадин министерстводин ва культурадин работникрин профсоюздин ЦК-дин знакдиз, "Хуьрел медениятдин рекьяй къаюмвал авунин отличник” тIварцIиз лайихлу хьана. 

Адаз гьакIни 1997-йисуз "РД-дин лайихлу артист” лагьай гьуьрметдин тIвар, 2011-йисуз РФ-дин культурадин министерстводин Гьуьрметдин грамота, гьакIни РД-дин Президентдин стипендияни гана. Сегьнедин устад Ш.Закерьяев тамашачийрин рикI алай, вичиз гурлу капар язавай актеррикай сад я. Лезги театрдин администрацияди, вири коллективди Шихабдуллагь Къазанбиевичаз юбилей рикIин сидкьидай тебрикзава, адан актервилин рехъ яргъиди ва гзаф жуьреба-жуьре ролралди мадни девлетлуди хьун кIанзава.