Алимдин цIийи ктаб

ТIвар-ван авай зари, филологиядин илимрин доктор Гьаким Къурбана лезги халкьдин 15300-далай гзаф мисалрикай туькIуьрнавай ктаб чапдай акъуднава. Авторди 1991-йисуз туькIуьрна басма авур "Лезги халкьдин мисалар” хьиз и ктабни гзаф метлеблуди, хъсан еридинди хьанва. Ктабда чи халкьдин агъзур йисара арадал атанвай, сиверай-сивериз фенвай, камалдивни эдебдив ацIанвай аламатдин мецин эсерар гьатнава.

Алимди вичин цIийи кIватIалда мисалар, чпин манадиз килигна, 14 чкадал пайнава ва абуруз чара-чара кьилер ганва. Гьар са кьил са шумуд мукьва темадиз талукь мисалрикай ибарат я. ЧIехи пай мисалар инсандиз талукь я, гьатта гьайванрикай туькIуьрнавай мисалрини инсандиз айгьам ийизва.

КIватIалдин хъсан жигьетрикай садни ам я хьи, бязи мисалар нугъатра жуьреба-жуьре кIалубра аваз ганва. Гьар жуьредихъни ви-чин кьетIенвал ава.

  

Ктабдин "Халкьдин камалдинни эдебдин хазина” тIвар ганвай сифте гафуна авторди чи мисалар кIватIунин тарихдикай, чи тIвар-ван авай фольклористрикай, икьван гагьди чара-чара ксари чапдай акъудай халкьдин мисалрин ктабрикай, гьакIни мисалар кIватI хъувуник пай кутур дидед чIалан ва литературадин муаллимрикай малуматар ганва.

Са гафни авачиз, жуван халкьдин камалдинни эдебдин хазина кIватIунин рекьяй чи машгьур алим Гьаким Къурбана гзафбуруз чешне къалурзава, абур кIватIун гьар са къелемэгьлидин буржи я лугьузва. Гь.Къурбана алатай йисан эхирра чапдай акъудай "Лезги халкьдин мисалар” гзаф къиметлу ктаб я ва и кардай адаз вири халкьдин патай чухсагъул къвезва.

Ктабдин рецензент Дагъустандин Гьукуматдин Университетдин профессор Гьажи Гашаров я