|
09:28
Яран Сувар мубаракрай, лезгияр!
Играми лезгияр, чи сайтдин иштиракчияр ва мугьманар!
ЛезгиЯр сайтдин коллективдин патай квез Яран Сувар рик!ин сидкьидай мубаракрай. Суварин тарихдикай лагайт1а, къенин суварин са пуд агъзур йис кьван я.
Вилик вахтара, кьуьд куьтягь хьана гатфар эгеч1дайла, инсанри суварин гьазурвилер аквадай. Адет тирвал, ширинлухар гьазурдай, виридан к1валера хъчадин хуьрек жедай, мугьманриз физ сувар мубаракдай ва нянин вахтунда чирагъарни куддай…
Гьуьрметлубур, куьн гьамиша шад суфрайрин иесияр хьурай, виридан к1валера бахт, берекат ва гьуьрмет хьун чи виридан ч1ехи мурад я.
Гьуьрметлу зари Сажидин Саидгасанован шиир куь фикирдиз гъизва:
Гатфарин Сувар
Дагъларал гьеле алама живер,
Гимишдин саягъ чукІуриз нурар.
Къаршиламишиз экуьнин сегьер,
Ракъини ачух хъийизва варар.
Ша, Яран сувар, ша гуьзел макъам!
Муштулухар гваз гьар садан кІвализ.
Къуй жегьилвили ягъуй шад макьам,
Гуьзел мурадар акъудиз кьилиз!
Бул жеда бегьер, техилар кьакьан,
Бул жеда некІер, хперин суьруь.
Бахтлувал патал чи гьар са йикъан,
Югъ яргъи жезва, йиферни куьруь
Ша, Яран сувар, ша гуьзел макъам!
Муштулухар гваз гьар садан кІвализ.
Гьикьван шадди я гатфарин макьам?
Еке мурадар акъуддай кьилиз!
Гатфарин сувар, халкьарин сувар,
Манийрин мелер, кьуьлерин межлис.
Ризкьидин гатфар, рагъ алай цавар,
Азад зегьметдин дустарин халис,
Ша, Яран сувар, ша гуьзел макъам!
Муштулухар гваз гьар садан кІвализ.
Къвердавай ширин хьун патал макьам,
Экуь мурадар акъудин кьилиз!
Лезги халкьдин портал – ЛезгиЯр.
Ниже приведены схожие материалы:
Категория: Новости ЛезгиЯр |
Просмотров: 5401 |
Добавил: Редактор
| В материале упоминаются:
0
