Канивилин есирда

И мукьвара Болгарияда лезги зари Билал Адилован шииррин улуб чапдай акъатнава. «Канивилин асирда» тIвар алай и улубдик акатнавай эсерар тIвар-ван авай болгар зари Дафинка Станевади элкъуьрнава.

Билал Адилов алай девирдин лезги поэзияда вичин махсус хатI, вичин кIелдайбур авай зарийрикай сад я. Шад жедай кар ам я хьи, чи заридин тIвар Урусатдин, гила лагьайтIа Болгариядин кIeлдайбурузни таниш я. Лезги халкь гьар са чIавуз вичин талант авай рухвайралди машгьур хьанва. Ингье, болгар чIалал акъатнавай улуб гъилеваз шадвилин, дамахдин гьиссер квехъ галаз пайиз кан хьана заз, играми кIелдайбур...

Са кьадар чIав я хьи, Б.Адилован шиирри стихи. ру эдебиятдин интернет порталда парабурун дикьет вичел чIугнава. Болгар зари Дафинка Станевани ихьтинбурукай сад я.

«Билалан шиирар чпин мана-метлеб, формадин иервал, гьиссералди рикIе гьатдайбур я. И шиирар чIехи са къадим канивилелди заз кьетIен я: дидедиз авай канивал, дишегьлидиз, ватандиз, хайи чилиз авай канивал. Ина гьижрандин гъам, канивилин хвешивал, чаравилин туькьуьлвални ава, поэзиядин туькIуьрунрин мана жагъурунни», - кхьизва Дафинка Станевади.

Гаф атайла лугьун, алатай йисуз Билал Адилован « 43» тIвар алай улубдиз экв акунай.. Адалай вилик лагьайтIа, «Литературная газетади» чап авур са цикл шииррикай урус шаиррини хъсан баянар ганай. Машгьур шаир Валерий Латынина авур элкъуьрунар «43» улубдикни акатна. Шад жедай кар я хьи, лезги заридин кьве шиир («Сердце помнит» , «Эгейскому морю» ) ада вичин «Избранное» улубдани туна. 2014 - йисан эхирда Урусатдин кхьирагрин кIватIалди вичин къарардалди Билал Адилов «43» улубдин бинедаллаз, поэзияда халкьарин арадавай дуствал мягькемарунин рекье агалкьунриз килигна, Михаил Лермонтован тварунихъ галай премия ва медалдиз лайих акуна.

Ша, чна Билал Адиловаз мадни чIехи агалкьунар, мадни чIехи кукIушар рам авун талабин. Куь гьар са шиирди, гатфарин атир галай чубарукди хьиз, дуьнядилай цIар элкъуьррай!