|
11:57
45 йисуз механизатор яз...
Перестройкадин ялав галукьдалди, чи районрани хуьрера колхозрини совхозри худда бегьерлудаказ кIвалахзавай. Майишатра вишералди лежберри, рабочийри, механизаторри, дояркайри, нехирбанри, чубанри, магьсулдарри, багъманчийри, уьзуьмчийри зегьмет чIугвазвай. Гьукуматди чпин вилик эцигнавай план-тапшуругъар абуру ян тагана кьилиз акъудзавай. И важиблу крарик вирида чпин лайихлу пай кутазвай. Зарбачийрин тIварар неинки хуьре-кIвале, гьакI районда ва республикадани машгьур тир. Идрисов Абидинни гьахьтинбурукай сад я. Ам ери-бине Сулейман-Стальский райондин Чуьхверхуьряй тир Бубадинни Тамуман кесиб хизанда 1930-йисуз дуьньядиз атана. Са гуж-баладалди кьил хуьзвай Буба са кьас фу къазанмишун патал Бакудиз фена. Гуьгъуьнлай ада вичин хизанни гьа иниз тухвана. Бубади заводда рабочийвиле кIвалахиз эгечIна.
Яваш-яваш агьвал хъсан хьана. Абидин мектебдизни фена, хъсандиз кIелиз, урус, азербайжан чIаларни чирна. Школа акьалтIарайла, ам ремесленный училищедик экечIна. Ада ина нефтяниквилинни механизаторвилин пешейрай чирвилер къачуна. Иллаки механизаторвилел адан рикI гзаф алай.
Абидина рикIел хкизвайвал, ам 1965-йисуз дидедиз куьмек гун патал Бакудай хуьруьз хтана. Жегьил пешекар МТС-да кIвалахал акъвазна. Ина ада, тракторар, машинар ремонт ийиз, цIийи ва ремонтдай акъатай техника ахтармишиз, механиквилин везифаярни кьилиз акъудна. Пешекар механикдин тежрибадикай са шумуд сеферда газетрани кхьенай. Са кьадар вахт алатайла, Абидиназ тIвар-ван авай «Касумкентский» совхоздиз трактордал кIвалахиз теклифна.
Им партиядин райкомдин тапшуругъни тир. Адал хъсан, гужлу тракторни ихтибарна. Вичин рикI алай пеше гъиле гьатайла, ада мадни ашкъидалди кIвалахиз эгечIна. Багъларайни саларай емишарни майваяр дашмишун, техил кIватIун, мал-къара патал яргъарай алафар чкайрал хкун, бязи вахтара цанар ва тумар цун Абидиназ адет хьанвай кIвалахар тир. Ам гьамиша кIвенкIвечи жергейра авай. Ада планар артухни алаз тамамарзавай. Зегьметкешдин шикил райондин ва республикадин гьуьрметдин доскайриз акъудна. Абидин Идрисов са шумуд сеферда райсоветдин депутатвиле, КПСС-дин обкомдин членвилени хкяна.
Общественный тапшуругъарни ада хъсандиз кьилиз акъудзавай. Уьмуьрдин юлдашдихъ галаз санал ада 5 гадани 3 руш тербияламишна, вири уьмуьрдин шегьредал акъудна. Абурукай Закир рагьметдиз фена. Маила, Мизамудина, Абдуселима ва Шамила шоферар - механизаторар яз кIвалахзава. Механизаторвилин рекьяй 45 йисан тежриба авай Абидина, рухвайриз хьиз, маса жегьилризни вичин пешедин сирер чирна. Вири уьмуьр механизаторвилиз бахш авур, датIана бегьерлудаказ кIвалахай ва общественный девлет артухарай Идрисов Абидиназ гьукуматди лайихлу къиметни ганва.
Адан зегьмет Октябрдин инкъилабдин, зегьметдин Яру Пайдахдин, Баркалладин ва Халкьарин Дуствилин орденралди, медалралдини знакралди, грамотайралди, къиметлу пишкешралди къейднава. А.Идрисов РД-дин лайихлу механизатор, жегьилрин насигьатчи ва зегьметдинни дяведин ветеран я. Фадлай пенсияда аваз ял язаватIани, зегьметкеш агъсакъал общественный уьмуьрдивай яргъа хьанвач. Ара атIуз акьалтзавай несилдин векилрихъ галаз школайра ахлакьдинни къанажагъдин темайрай гуьруьшар тешкилзава, уьмуьрдикай суьгьбетарзава. Гьавиляй адаз хайи хуьруьн жемятдин патай еке гьуьрмет ава.
Райсудин Набиев, «Лезги газет»
Ниже приведены схожие материалы:
Категория: Лезгины в России |
Просмотров: 2466 |
Добавил: Редактор
| В материале упоминаются:
Оставьте свой комментарий!