ЧIехи агалкьунрин рекье аваз…

Чирвал къачур гьеле садни пашман хьанвач. Дегь девиррилай та къенин йикъалди, инсаният а экуьвилихъ чалишмиш жезва. Вичин уьмуьрда инсан, илимрин сифте кIарцIел мектебда хкаж жезва.

Гьа вири аялри хьиз Тельманан руш Гуьлдесте Агъаметовадини Усугъчайдин юкьван школада сифте чирвилер къачуна. 

Школада ада чешнелудаказ кIелна, муаллимрин ва юлдашрин гьуьрмет къазанмишна. Школада кIелдай йисара Гуьлдестедихъ иллаки инглис чIалай агалкьунар авай. 

Са шумуд сеферда ада райондин олимпиадайра тарифлу чкаяр кьунай, 10 – классда авайла инглис чIалай Махачкъалада фейи Дагъустандин олимпиадада 3 – чка къазанмишна.

2010 – йисуз экстерна имтигьанар вахкана Г. Агъаметова ДГУ-дин Востоковедение факультетдиз кIелиз гьахьна. Ина жегьил дагъви руша туьрк, араб ва инглис чIаларай чирвилер къачуз хьана. Сифте курсунилай лап хъсан кIелиз башламишай Гуьлдесте, факультетдин чешнелу студентка хьана. КIелзавай йисара ада республикадин гьар жуьре конкурсра иштиракна.

Алай йисан апрелдин вацра М.В.Ломоносован тIварцихъ галай МГУ-дин Азиядин ва Африкадин гьукуматрин институтда кьиле фейи «Ломоносов – 2014» тIвар алай студентрин, аспирантрин ва жегьил алимрин XXI – международный илимдин конференциядин «Востоковедение ва африканистика» секциядай Г. Агъаметовади кхьей доклад виридалайни хъсанди яз гьисабна. 

Нетижада рушаз I – премиядин МГУ-дин Азиядин ва Африкадин гьукуматрин институдин директор Игорь Ишеналиевич Абылгазиеван къул алай грамота ва диплом пишкешна. 

Им гьелбетда рушан чIехи агалкьун я. Къенин юкъуз Гуьлдесте хьтин студентка хьунал Республикади ва гьакI адан районэгьлийри ва хуьруьнвийри кьил хкажуналди дамахзава. Чухсагъул адан диде-бубадиз ихьтин велед тербия гана чIехи авунвай. Гележегда чи дагъви рушахъ генани чIехи агалкьунар жедайдахъ чна умудар кутазва.