|
09:35
Дагъдин хуьре мехъер
Им фад хьайи кар я. Чаз, студентриз, гьуьрметлу Мурад муаллимди суьгьбетзава: «Кьакьан дагъдин, вич райцентрадивай 35 километрдин яргъа авай Фиярин хуьряй (Ахцегь район) дустунин хцин мехъерик иштирак авунин теклиф гваз патав илчи атайла, зун кьадарсуз шад хьанай. Чапла гъилик мехъерин лишан тир келегъани кутIуннавай и жегьил касди заз лагьанай хьи, бес райкомдин кIвалерин вилик (и кIвалер виликдай малла Зекерадинбур тир) чун хуьруьз хутахдай автомашинди гуьзлемишзава. Автомашинда залай алава дустунин мехъерик эвернавай мад пуд кас ацукьнавай. Югъ рагъ авай гуьлуьшанди тир. Гьамамрилай виниз Фиярин хуьр галай терефдихъ фидай дередиз гьахьайла, тIебиатдин гуьрчегвилел гьейранвал тавуна жедачир. Машин акъвазарна, чун вири анай эвичIна. Кьуд патаз килигиз, са шумуд декьикьада акъвазна. Ина дуьзен са пIипI жагъурна, ахцегьви са куьнуьчиди вичин чIижерин куьнуьяр гатун вахтунда ина эцигнавай. Са тIимил мензилдиз мадни вилик хъфейла, дагъдин синелай гуя чаз виш йис яш хьанвай агъсакъал килигзава. Лугьумир кьван, им тIебиатди къаядикай туькIуьрнавай агъсакъалдиз ухшар авай къаядин кIус тир. Фиявийри адаз "Фиярин агъсакъал» лагьана тIварни ганва.
Заз виридалайни тажуб ва хуш хьайиди а кар тир хьи, хуьруьз агакьиз мукьва чи къаншардиз, дишегьлидин кьилел хунчани кьуна, авазрин сес кьилел алаз зуьрнечияр атана. Абуру чун хуьруьз кьван и авазрик кваз рекьени туна.
Хуьре йифиз кьве чкадал мехъерар кьиле физвай. За а мехъеррик иштиракунал рикIивай шадвалзавай. Анрик квай адалат, къайда акурла, кьакьан дагъдин хуьре и жуьреда мехъерар авун ажайиб кар тир. Жегьилар вири кIвачел акъвазнавай. Яшлубуруз ацукьдай чкаяр бес кьадар авай. Мехъерин сагьибар мугьманрин къуллугъда акъвазнавай.
Анжах тамадади тIвар кьур касди, мехъерин майдандал экъечIна, кьуьл ийизвай. Са жуьредин шабашар гунарни авачир. Хуьруьн ашукь Ширина музыкантри ял акъадарзавай декьикьайра, мехъерин кьве майдандални фена, нубатдалди манияр лугьузвай. Захъ галай юлдаш Имамавай чпин хуьре вири межлисар ва мехъерар и тегьерда тухузвани лагьана хабар кьурла, ада жаваб гана:
«Эхь, стха, чи дагъдин хуьре гьич са чIавузни мехъеррик къал-макъал жедайди туш...». Гьикьван хъсан тир и жуьредин мехъерар, межлисар амай вири хуьрерани жедайтIа...
Амма зун маса чкайрани мехъеррик хьана эхир. ИкI, чна вичиз дагълара авай шегьер, медениятдин меркез лугьузвай Ахцегьрин къадим хуьре кьиле физвай са мехъерик акур аламатар къенин юкъузни рикIяй акъатзавайди туш, - давамарзава вичин суьгьбет Мурад муаллимди.
- Алай вахтунда медени райцентрадал гьалар гьикI ятIа заз чидач. Анжах а чIавуз ачух майдандал тухузвай мехъерин межлис са кьадар яцIа гьатайла, майдандиз экъечIай кьве жегьилди (заз абурухъ элкъвена къучияр лугьуз кIанзава) мад гьич садазни кьуьл ийидай нубат хганач. Сада-садан гарданрихъ гъилер вегьена, абуру межлисдин эхирдалди икI давамарун мумкин тир. Бахтунай хьиз, са гьинай ятIани Социализмдин Зегьметдин Игит Саимат Ферзалиева пайда хьана. И жегьилриз мукьва хьана, ада ханандаяр акъвазарна.
Гъилерихъ пагьливандин къуват авай игит дишегьлиди и кьве къабачи кьуна, акI сад-садахъ геляна хьи, гуя абурай цIай акъатна. Татаб хьана ярх жезвай жегьилар Саиматал тепилмиш жез башламишна. Гьа и арада, эверайбур хьиз, межлисдин майдандал акъатай милициядин работникри кьве жегьилни кьуна хутахна, абур йиф милициядин идарадин кIаник квай подвалда акъудуниз мажбур хьана.
Гьайиф хьи, вири дуьшуьшра Саиматарни жагъидач эхир! Эхиримжи вахтара мехъеррин эвездай мевлидар гунин кардални чан атанва. Гьакъикъатда лагьайтIа, мевлид чи алейсалам Мугьаммад Пайгъамбардин тIварцIихъ галаз алакъалу маса мярекат я эхир. Мехъер-межлис шадвилин, кьуьлердай, манияр лугьудай, тостар хкаждай мярекат тушни бес. Зи фикирдалди, - тестикьарзава Мурад муаллимди - и кьве мярекат сад-садак какадарун эсиллагь дуьз туш.
Айваз Абдуллаев, студент, «Лезги Газет»
Ниже приведены схожие материалы:
Категория: Традиции Лезгин |
Просмотров: 3756 |
Добавил: Редактор
| В материале упоминаются:
Оставьте свой комментарий!