Милли политикадин стратегия ам вуч я? Иливар гьикIда?

Милли политика обществода кьилин месэлайрикай сад тирди, ам дуьз кьиле тухунилай чи къенин ва иллаки гележегдин кьисметар тамамвилелди аслу тирди аннамишзавайбур гзаф хьанва. Кьве терефдин векиларни чпи-чеб гьахъариз алахъзава. Амма общество, Ватандин саламатвал, несилрин гележег хуьн патал герекди са гьахъ я. А гьахъ вуч я? Ам ни хуьзва? Гьи рекьери арадал гъида ва хуьда? 

И рекьера адетдин, инсанрин, яни политикадивай яргъабурун роль гьихьтинди ятIа?.. Милли политикадин месэлаяр лап хци хьанвайди чи уьлкведа Россиядин халкьарин Ассамблея хьтин общественный тешкилат арадал гъунини, Дагъустанда и мукьвара Россиядин халкьарин Конгресс эвер гунини (аниз Россиядин саки вири регионрай гзаф кьадар векилар атанвай), РФ-дин Госдумадани и жигьетдай чIехи рахунар авунини ва, эхирни, РФ-дин Президент В.В.Путинан теклифдалди 2025-йисан девирдалди милли политикадин Стратегия тайинаруни лугьузва. Милли политикадин Стратегия…

Сифте яз ван жезвай и келимадин деринвал, важиблувал, гереквал квекай ибарат ятIа? Милли месэлаяр гьялун патал и документдихъ (Программадихъ) вуч метлеб ава?.. Винидихъ лагьанвай фикир инал чна мад сеферда тикрарзава: чи хьтин чIехи государствода эхиримжи 20 йисан къене милли политикадал машгъул махсус органар (тешкилатар лагьайтIани) авачир. Гъиляй вегьенвай и лап важиблу хел (тереф). Милли алакъайрин диб тамамвилелди хкатна лагьайтIани жеда. Хийир низ гана? АкьалтIай миллетбазризни, диндин экстремистризни, радикалризни сепаратистриз. Куьрелди, ида Россиядин общество, чи чIехи уьлкве тике-тике авуна, адан халкьар сад-садал гьалдардайбурун майданар гегьеншарна. Чи уьлкве ва общество къе гьихьтин хаталу цIарцIел алатIа лугьун четин я. Чи садвили чун хуьзва. Бес чун къакъатун низ кIанзава? 

Адетдин инсанри бажагьат лугьуда, чун санал яшамиш жедач, кьилди-кьилди хьайитIа хъсан я. РикIел хкин, СССР хуьдани хуьдачни лугьуз, Референдум тухвайлани, 96 процент агьалийри ам хуьн патал сес гайиди я. СССР чукIурунин гаф садан мецелни алайди тушир. Амма чукIурна ам. Горбачеварни, Ельцинарни, Шушкевичарни, Кравчукарни ва ихьтин маса "регьберар” кьиле акъвазна… Варшавадин Договарни чукIурна, Берлиндин цални ацадарна…

НАТО мягькемарна. ЦРУ-ди вичин гъалибвал къейдна. Германия сад хъхьана…Чи халкьарив вуч агакьна??? Америкади, гьакъикъатдани, вичихъ садазни таганвай ихтиярар авайди хьиз гьиссзава. Адан зил кьазвайбурни тIимил туш. Вичиз «хуш тахьай» вирибур жазаламишзава: Югославияда - Милошевич, Иракда - Саддам, Ливияда - Каддафи, Сирияда - Башар Асад… Россиядизни «тарс» гуз алахънава. Са жизви бушвал авуна, серфе квадарайтIа, США-дин дяведин гимияр Каспий гьуьлелни атун мумкин я. 

Кавказ Россиядивай къакъудиз алахънавай вирибурун къаст, чпиз чизни-течизни, Россия чукIурун, адан девлетрин иесивал авун я. Миллетчивилинни диндин экстремизмдин, сада-сад иливар тавунин тIегъуьн чина чукIурунин къастни гьам тушни бес! Са жизви Россиядин тереф къуватлу жез, Россиядин экономика кIвачел ахкьалтзавайди, халкьарин къаст сад тирди акурвалди чал элкъвен тийизвай ампа авач. Я чак кутан тийизвай рехнени амач. 

Чи дамуна, ивида къекъвез алахънава. И дин - а дин, и тереф - а тереф лугьуз, «акьулар» гуз алахъзава. Хаталуди а кар я хьи, патанбурулай «жуванбур» лугьудай политиканар (Жириновскиярни Познерар, Сванидзеяр) викIегь жезва. Жуван ватанда жуваз къуллугъна кIанзавай гзаф телеканалрини, журналистрин кIватIалрини, тапан политикрини, фашал регьберрини мукьвал-мукьвал милли кьетIенвилерик хкуьрун, чи халкьар, иллаки кавказвияр урусрин душманар хьиз къалуриз алахъун - им бес чахъ фагьум-фикирна тешкилнавай милли политика (сиясат) тахьунин нетижа тушни? Кавказда аялар хунал къадагъа эцигна кIанда лугьузвай политикдиз урусарни Россия кIанзавайди я жал? 

Государстводин кьилин регьберриз и кар аквазвачни? Куьчедал хьайи са гъвечIи чуьруькни миллетрин душманвилин дережадиз акъудиз алахъуни квекай лугьузва? Аллагьдиз шукур, милли политика, миллетрин крарал машгъул махсус органар галачизни чи халкьари чпи-чеб хуьзва, иливарзава!.. Милли политикадикай рахайвалди, чуьруькрик кьил кутазвайбурни (чпел «ватанпересар«, «либералар», «гьакъикъи демократар» ва маса тIварар алаз) секин жезвач. И.В.Сталина лагьайвал, чун къуватлу жердавай чи душманрин аксивилерни артух жезва. Гьавиляй милли сиясат (Стратегия) чаз герек я. Ам вуч илим (алем) ятIа кьил акъудун, дуьз рекьер хкягъун, чахъ тарихда хьайи вири хъсан адетар хуьн, абур пропаганда авун, цIийи шартIара цIийи къуватар хгун ва, эхирни, халкьарин садвал, дуствал, архавал хуьн - им чи чIехи Ватан хуьнин асас тереф яз хкягъун патал алакьдай вири крарик кьил кутун лазим я. 

Абур вуч крар ятIа Стратегияда хъсандиз, галай-галайвал лагьанва. Гафар крариз элкъуьрна кIанзава. Чун вири россиявияр - са Ватандин, са тарихдин, са рекьин веледар тирди, чахъ чи бубайри тур дуствилинни санал яшамиш хьунин чIехи ирс авайди, ам чирун ва хуьн - им чи патай чи вири душманриз гудай дуьз жаваб жедай...