Ругуд сеферда чемпион

Алатай вацра Татарстанда залан атлетикадай жаванрин арада Россиядин кIвенкIвечивал патал акъажунар кьиле фена.

Турнир Зеленодольск шегьердин «Маяк» тIвар алай спорткомплексда тешкилнавай. Ана уьлкведин 40 региондай 130-далай гзаф спортсменри иштиракна - Ахты райондин сайт хабар гузвай

Залан атлетикадай Россиядин спортдин мастер, тренер Халил Мирзоева чаз хабар гайивал, адан ученик Асали Абдулгьашумова и акъажунра гъалибвал къазанмишна ва 6-сеферда Россиядин чемпион хьанва.

Асалиди акъажунрин сифте юкъуз 62 кг заланвал авай спортсменрин арада рывокдай 118 кг ва толчокдай 150 кг къвезвай штанга хкажна. Жегьилдин и агакьундалди адан тренерри, мукьва-кьилийри ва ярар-дустари дамахзава, Асалидихъ мадни еке агалкьунар хьун гуьзетзава. Нубатдин и тIвар къазанмишун чна Асалидиз ва адан тренер Халил Мирзоеваз рикIин сидкьидай мубаркзава.

                

Къейд ийин, кьве йис вилик Асали Польшада кьиле фейи Европадин акъажунра 56 кг заланвилин категориядай къанни цIудалай гзаф спортсменрин арадай 2-чка къазанмишнай. ГьакIни, Россиядин кIвенкIвечивал патал акъажунра ада Обнинскда 115кг + 147 кг залан штанга хкажуналди гъалиб хьанай.

                

Асалидихъ мадни еке агалкьунар хьун чи гьар садан мурад я.