Рустам Аразов - Гележег авай пагьливан

Алай аямда спортди гегьеншдиз вилик еримишнава. Адал машгъул жегьилар ва гьакI абурухъ жезвай агалкьунар йисалай-суз артух жезва. 

Вичин ери-бине Докъузпара райондин Усугъчай хуьряй тир Рустам Аразов гьа ихьтин кьегьалрин жергедай я. Алай вахтунда ада Каспийск шегьердин 4 - нумрадин школада 9-классда кIелзава. 

2012 – йисалай Рустам, Кь. Кьурамегьамедован тIварунихъ галай азаддиз кьуршахар кьадай школадиз физ хьана. Йисни зуран къене ада гзаф акъажунра иштиракна. Вичин сифте медаль Рустама, шегьердин ва республикадин акъажунра 2 ва 3 – чкаяр кьуналди къазанмишна. 

2013 – йисан мартдин вацра Беларусиядин Гомель шегьерда азаддиз кьуршахар кьунай кьиле фейи «Къизилдин машах» тIвар алай турнирда Р. Аразова 3-чка кьуна. 

2014 – йисан февральдин вацра Орловский областдин Мценск шегьерда азаддиз кьуршахар кьунай кьиле фейи Вирироссиядин турнирда 1-чка къазанмишна. 

Гьа и йикъара Беларусиядин Гомель шегьерда азаддиз кьуршахар кьунай кьиле фейи «Къизилдин машах» тIвар алай Международный турнирда Рустама 1-чка кьуна. 

Чна адаз хьанвай агалкьунар тебрикзава ва спортдин рекьяй генани еке кукIушрихъ агакьун тIалабзава.