Шаир Желил Мурадалиев рагьметдиз фена

2019-йисан 10-февралдиз лезги шаир, публицист, драматург, пара йисара Мегьарамдхуьруьн райондин «Самурдин сес» газетдин кьилин редактор яз кIвалахзавай Желил Пиралиевич Мурадалиев рагьметдиз фена, - «Лезги газет» хабар гузва. 

Ам 1933-йисуз Мегьарамдхуьре дидедиз хьана. Юкьван мектеб Миграгъа акьалтIарай жегьилди кIелунар Ташкентда театрдин институтда давамарна.

Желил Мурадалиев лезги литература, публицистика вилик тухвай ксарикай сад я. Адан къелемдикай хкатай цIудралди очеркар, макъалаяр газетризни журналриз акъатна, кIелдайбуру хушдиз кьабулна. «Самурдин сес» газетдин кьилин редактор яз кIвалахзавай йисара тежрибалу журналистди гзаф четинвилериз дурум гана, газетдин дережа агъуз вегьенач, мадни цIийи кIарариз хкажна.

Желил Мурадалиев са шумуд ктабдин авторни я. Ада шиирар, гьикаятдин, драмадин эсерар кхьизвай. Автордин «Тахай руш» пьесадин бинедаллаз Лезгийрин СтIал Сулейманан тIварунихъ галай госмуздрамтеатрди тамаша эцигна. РД-дин культурадин лайихлу работник Желил Мурадалиева гзаф йисара Лезги писателрин Союздин Мегьарамдхуьруьн районда авай отделенидиз регьбервал гана.

Лезги халкьдин гьар са агалкьундал рикIивай дамахай фронтдин далу патан ва зегьметдин ветеран, къени инсан, камаллу насигьатчи Желил Мурадалиеван экуь къамат чи рикIера амукьда.