Гьажи Давуд Муьшкуьрви

Лезги халкьдин ва Регъпатан Къавкъаздин тарихда Гьажи Давуда лап кьакьан ва лап машгьур чка кьазва. Лезгийрин зурба гьукумдар, Ширвандин хан хьайи ада вичин уьмуьр лезги чилер Ирандин кьушунрикай азад авуниз ва лезги гьукумат арадал хкуниз къурбанд авуна.

 

Гьажи Давуд тахминан 1670 – 1678 –йисара Къуба уезддин Тителар хуьре хана. 

1712 ва 1721 – йисара лезги кьушунрин кьилеваз Гьажи Давуда Шемаха шегьер иранлуйрикай азадна. Регъпатан Къавкъаздиз темягь авай пуд къуватдикай (Туьркия, Иран, Урусат) Гьажи Давуда вичиз парт1 яз Урусат хкягъна. 1721-йисан апрелдин вацра Гьажи Давуда са шумудра I – Петрдиз персериз акси дяведа вичин даях хьухь лугьудай теклифар ракъурна. И кардай ада Урусатдин чилер Исфахандал кьван фирягь ийида лагьана хиве кьунай. 

Амма гьеле я I – Петрди, я адан гьукумдарри Урусат паталди Къавкъаздикай вуч хийир жедат1а кьат1аначир. Аксина яз, абуру вичин чилер къажаррикай азад ийизвай кьегьал Гьажи Давудак, Иран шагьдиз акси экъеч1зава лугьуз, футфаяр кутунай. Гьатта I – Петрди, Гьажи Давудаз акси яз, вичел тарихда «Персидский поход» – т1вар акьалтай дяведин походни тешкилнай.

Гьавиляй Гьажи Давуд туьркверивай куьмек т1алабуниз мажбур хьанай. Туьркверин пашади ам хушвилелди кьабулна ва адаз Регъпатан Къавкъазда виридалайни кьакьан чин гана. Гьажи Давуда гзаф гъалибвилер къазанмишна. 

Амма Туьркиядиз Гьажи Давуд къуватлу хьун, лезги гьукумат арадал атун герек тушир. Гьавиляй, 1728-йисан майдиз тапан багьнадалди Генжедиз эверна, туьрквери Гьажи Давуд кьуна. Уьмуьрдин эхиримжи йисар Гьажи давуда Родос кьураматдал акъудна. Гьана адан сурни ава.