Хайи чIалан къадир хьуьх

Играми редакция! Сумгаитдин Гьукуматдин Университет акьалтIарай за алай вахтунда Къебеле шегьерда кIвалахзава. Ина, жуван хайибурун кьула кIвалахун заз гзаф хуш я. Ингье са месэлади захъ къалабулух кутазва. Вучиз ятIани са бязи лезгийри хайи чIал кваз кьазвач. Хайи чIалал са ктаб, я газет кIелун абурун рикIяй туш.

Гьа инал лугьун хьи, чи рикI алай "Самур" газетди хайи чIал кIанарун ва хуьн патал гьикьван чIехи алахъунар ийизва. Лезгидалди газетдин чиниз акъудзавай макъалайри чаз чIал чирзава, чи руьгь юзурзава. Садбуру гьелени ихьтин газет кхьин тавун дуьз яни бес? Газетдин даях хьун гьар са лезгидин буржи тушни?

     

Гьа куьне кхьизвайвал, чи чIал къадимни я, девлетлуни. Икьван хъсан чIал чна хуьн тавурла, ни хуьрай? Играми редакция, гьа инал заз са теклиф гуз кIанзава. Жечни газетда "Хайи чIалан дустар" рубрика кардик кутуртIа. И рубрикадик кваз хайи чIалалди дамахзавай, ам теблигъзавай, виликди тухузвай ксарикай макъалаяр чапнай-тIа, хупI хъсан тир. 

Зун патал лезги чIалан гьар са гаф тай авачир инжи я. ЧIалай са гаф квахьайтIа, ам рикIел хкун тавуртIа, эхиз женни халисан лезгидивай? Гьавиляй за лугьузва: Чан лезги стхаярни вахар, хайи чIалав мукьувай агата, ам вилин нинеяр хьиз хуьх. Чан лезги дидеяр, жуван аялриз хайи чIал чира. Чан лезгияр, жуван кIвале, жуван хуьрени шегьерда хайи чIалал рахух. ИкI авуртIа чи чIални яргъалди яшамиш жеда, чи тарихарни.