Профессор Османов

Москвадин жегьил лезги алимрикай гаф кватайла гьасятда Элхан Османован тIвар рикIел хкведа. 25 йиса авайла кандидатвилин, 33 йиса докторвилин диссертация хвейи, 35 йиса профессорвилин дережа къачур и хирург вичин агалкьунралди вириниз сейли я. Дамаррин хирургиядин илимдик вичин пай кутур ада трамбофлебит, варикоз, трамбоз, атересклероз хьтин залан азарар операциядин рекьелди куьруь вахтунда бегьемдиз сагъаруникай РФ-дин ва къецепатан уьлквейрин журналистри цIудралди макъа-лаяр кхьенва.

      

1975-йисан 5-августдиз Бакуда дидедиз хьайи Элхана 247-нумрадин юкьван мектебда кIелна. ЦIуд йисан къене датIана «5» къиметар къачур адан аттестатдиз къастунай са «4» къиметни кхьенай ва Элханаз ам лайих тир къизилдин медаль ганачир. Гада руьгьдай ават тавурай лу-гьуз хайибуру адаз рикI-дуркIун ганай. «Уьмуьр яргъиди я, жуван алакьунар су-бутун патал гзаф рекьер авайди я», - лагьа-най абуру. Акьуллу гафуни акьуллу кар хада, лугьуда бубайри. Элханани субутна: Азербайжандин Гьукуматдин Медици-надин Университетдик экечIна, ана чешнелувилелди кIелна, Н.Нариманован тIварунихъ галай стипендиядиз лайихлу хьана.

1988-йисуз университет акьалтIарна, М.Нагъиеван тIварунихъ галай республикадин клиникада интернатурада хьайи жегьил гъавурда акьуна хьи, акьулни илим стхаяр я. Илимдихъ ялайтIа камалдив агакьдайдан чIалахъ тир гада вичин ала-кьунар винел акъуддай, вичи чIугур зегьметдин бегьер кIватIиз жедай майдандихъ гелкъвезвай.

Ихьтин майдандин суракьда аваз Москвадиз рекье гьатна ам. И.М.Сеченован тIварунихъ галай Москвадин сад лагьай медицинадин университетдин хирургиядин фа-культетдин ординатурадик экечIай ада сифте йикъалай профессорринни муаллимрин фикир желбна.

     

Вичин фикир-фагьумдалди, садан куьмекни галачиз илимдин рекье кьетIен камар вегьизвай и зегьметдал рикI алай кьегьал гадади куьруь вахтунда университетда чIехи гьуьрмет къазанмишна. 2002-йисуз кандидатвилин диссертация хвейи ада 3 йисуз дамаррин хирургиядин кафедрадин кьилин лаборантвиле, 2004-2009-йисара ассистентвиле, 2009-2012-йисара доцентвиле кIвалахна.

      

Са йис я ам профессор яз. 130-далай гзаф илимдин кIвалахрин автор тир Элхан Османова гьакIни 4 патент къачунва. Адан «Ириндин хирургиядин плазмадин технологияяр» тIвар ганвай монография медицинадин илимда вакъиадиз элкъвенва.

      

Элханан несилда духтурар гзаф ава. Диде Загьидат Улуханова, халу Асим Улуханов тIвар-ван авай духтурар я. Элханан уьмуьрдин юлдаш Сабина лагьайтIа, КцIарин сейли духтур Низами Рустамован руш я. Азербайжандин Гьукуматдин Медицинадин Университет чешнелудиз акьалтIарай Сабинади ординатура Москвадин сад лагьай медицинадин университетдин  гинекологиядин ва акушервилин факультетда кьилиз акъудна. Алай вахтунда ам Москвадин Н.А.Семашкодин тIварунихъ галай  Гинекологиядин ва Акушервилин Меркездин духтур я. Вичин гъуьлуьн хьиз, аданни илимдал рикI ала. Ирид ва кьве яшар хьнвай  кьве хциз дидевалзавай Сабина гила кьетIидаказ илимдихъ гел-къвезва. Адан 4 илимдин макъала чап хьанва. Элханани виридаз хьиз, вичин уьмуьрдин юлдашдизни илимдин рекьяй алакьдай куьмекар гузва.

     

Чина мили хъъвер авай, къени къи-лихрин, инсанрихъ агъвадай, датIана чирвилерихъ ялзавай, гегьенш дуьнья-кьатIунар авай профессор Элхан Османован пациент хьайи инсанри ам садрани рикIелай алуддач. Адан кьилив СНГ-дин уьлквейрай гзаф инсанар къвезва. Азербайжандинни Дагъустандин лезгияр паталди лагьайтIа, ам «жуванди» я.

     

Адахъ галаз ихтилат авур гьар са касди «экуь инсан я ам» лугьуда. Гъиле Къуръан, рикIе иман авай адан хайи халкьдал рикI хьунухьи, адал дамахуни, дидед чIал вине кьуни гьейранарда инсан.

     

Гьар йисуз ял ягъун патал ватандиз - КцIариз хкведа ам. Аваран хуьре авай чIехи бубадин кIвал къени ийида. Буба Гьажиханахъ галаз санал мукьва-кьилияр, хайибур агудда. Хуьруьн хийир-шийирдикай хкатдач, лезги адетар рикIелай ра-къурдач. Са гафуналди, гзафбуруз чешне я профессор Элхан Османов вичин алакьунрални агалкьунралди.