Лале Садировадин шиири гьар садан рик1е муг ийида

Къенин суьгьбет чи лезги халкьдин зари Лале Садировадикай я. Лезги руш Лале Садирова Азербайджан Республикадин Кц1ар шегьерда 1991 йисан 25 февралдиз дидедиз хьана.

Вичин сифте эсерар мектебда чирвилер къачузмаз кхьей Лаледи алай вахтунда Азербайджан Республикада лезги халкьдин культура вилик кутазава.

— «Жуван сифте шиир за хайи Ватандиз багъишна. Кьвед лагьай шиир за сив хуьнин вацра кхьейди къе хьиз рик1ел алама. Зи гьар са дафтардин эхиримжи чар ширдиз тунвайди тир. Лезги ч1алан поэзиядик зун 2010-2011 йисара эгеч1на» - тестикьарна Лаледи.

Бакудин Славян Университетдин журналистикадин факультет хъсан къиметралди акьалт1арай Лале ханум «Qusar-Кцlар» газетдин корреспондент жезва.

Гьа ик1 яваш-яваш вичин чирвилер гегьеншарзавай лезги руш чи лезги халкьдин гуьгьуьл шадариз эгеч1на.

— «Сифте шиирар за лезги зари Билал Адиловаз къалурна. Билал муаллимди зун гьар са гъалат1дин гъавурда туна, зи эсериз дуьз къемет гана. Билал Адилов, Гюзеля Гасанова ва Раида ханум – ингье заз еке чухсагъул лугьуз к1анзавай зи муаллимар», - хиве кьуна чи зариди.

Лале, заз малум тирвал, шиира кхьидай ашкъи ваз, гуьгьуьл хайила къвезва..

— Ун, авай кар я. И кардин патахъай завай ваз ихьтин жаваб гуз жеда: «Ваз т1алдикай хабар амайкьван, вал чан алама, амма ваз чарадан т1алдикай хабар хьайила, вун – инсан я».

Сагърай, Лале. Вахъ гьихьтин т1алабунар ава жегьил шаирихъ?

— Гъиле кьур кар эхирдалди кьиле твах..садрани гьевесдиз килигмир..

Чухсагъул ваз, вах. Чи халкьдихъ вун хьтин рушар гзаф хьурай. Ваз Аллагьди чандин сагъвал ва уьмуьрдин яргъивал кьисметрай.

— Куьнни сагърай чун рик1елай алуд тийизвай. Еке агалкьунар хьурай куь сайтдихъ.

Лале Садировадин яратмишунар

Лезги халкьдин портал – ЛезгиЯр.