Дережа мадни виниз акъудин!

Конкурсдин нетижайрал асаслу яз, "Лезги газетдин" кьилин редактордин везифаяр алай йисан 13-январдилай зи хиве гьатнава. Къейд ийин хьи, къенин юкъуз чи газетдин тираж Дагъустандин амай чIаларал акъатзавай газетрин тиражрилай хейлин артух я. И карди "Лезги газетдин" кьулухъ савадлу, къанажагълу, медениятдивни тарихдив къадирлудаказ эгечIзавай халкь галайдан гьакъиндай шагьидвалзава. И делилди зав жуван хиве авай жавабдарвал гьикьван чIехиди ятIа, мад сеферда гьиссиз тазва. Баркалла милли газетдин къадир авай, адан роль, метлеб квекай ибарат ятIа чизвай, газет кхьиник къуьн кутазвай виридаз!

Багъри газетдин дережа коллективдихъ галаз санал мадни виниз акъудун патал за жуван вилик тайин макьсадарни эцигнавачиз туш. Амма абур раиж ийидалди заз "Лезги газетдин" виликан редактор, РФ-дин культурадин лайихлу работник Агъариза Узаирович Саидован гьакъиндай кьве гаф лугьун кутугнаваз аквазва.

Агъариза Узаировича чи багъри газетдиз къанни кьве йисуз регьбервал гана. Им акI лагьай чIал я хьи, адан тIварцIихъ галаз сагъ са девир алакъалу я. И чIавуз уьлкведа, республикада хейлин дегишвилер, гьерекатар кьиле фена, идахъ галаз сад хьиз - лезги халкьдин уьмуьрдани. Ватанэгьлийрин уьмуьрда кьиле физвай са вакъиадивайни "Лезги газет" къерех хьанач. Са шакни алачиз, адан чинрал гъайи гьар са месэла, халкьдин шадвални дерт Агъариза Узаировича вичин чандик хсусиди хьиз кужумна. Къанни кьве йисан девирда Агъариза Узаировича газетдин коллективдихъ галаз санал кIвалахдин рекье гьикьван уькIуь-цуру дадмишнатIа, гьикьван татугайвилериз дурум ганатIа, четин уламрай экъечIнатIа, сан-гьисаб кьун асант кар туш.

Къайгъудар багъманчиди вич гелкъвезвай бегьерлу багъдин уьмуьр цIийи къелемар акIуруналди яргъи ийида лугьудайвал, Агъариза Узаировича багъри газетдин редакциядиз жегьил къуватар желб авунизни еке фикир гана. Ада "Лезги газетдин" редакция дидед чIалал кхьидай мухбирар гьазурдай мектебдиз элкъуьрна. Къе милли журналистикада бегьерлудаказ зегьмет чIугвазвай Шагьабудин Шабатов, Дашдемир Шерифалиев, Жасмина Саидова, Рагнеда Рамалданова, Жамиля Гьасанова, Къагьриман Ибрагьимов, Муса Агьмедов, Эмираслан Шерифалиев, Куругъли Ферзалиев, и цIарарин автор ва хейлин маса мухбирар Агъариза Узаировичан мектебдай акъатнавай сухтаяр я лагьайтIа, зун гъалатI жедач.

Къуй Агъариза Узаировичаз Сад Аллагьди чандин сагъвал аваз яргъал йисара хтулринни птулрин гьуьрметрикайни тавазивилерикай лезет къачудай мумкинвал гурай.

Журналистикадин хиле 55 йисуз бегьерлудаказ зегьмет чIугунвай Агъариза Узаировичан меслятарни насигьатар "Лезги газетдин" коллективди гьамиша хушвилелди кьабулдайдал са шакни алач ва лезги прессадин агъсакъалди, вичин кьвед лагьай хизандиз элкъвенвай багъри газетдин редакциядин коллективдихъ галаз сих алакъаяр гележегдани хуьник умуд кутазва.

Къе, «Лезги газетдин» кьилин редактор яз, за жуван вилик эцигнавай кьилин макьсадни Агъариза Узаировича чал, жегьил несилдин векилрал, агакьарнавай дережа агъуз тавун, ам мадни хкажун я. И карда чна, газетдин редакциядин коллективди, чахъ галаз алакъаяр хуьзвай интеллигенциядин векилрин, мухбиррин-амадагрин, санлай вири лезги халкьдин куьмекдик еке умудар кутунва.

«Лезги газет» - им сифтени-сифте чи халкьдин милливал хуьзвай, халкь агудзавай, тупламишзавай руьгьдин къул я. Халкьдин тарихдив, медениятдив къадирлувилелди эгечIун, акьалтзавай несилри дидед чIал, бубайрин адетар хуьн ва еримлу авун патал газетди кьиле тухузвай кIвалах чIехиди я. Гьелбетда, руьгьдин девлетар, ивирар хуьнихъ галаз санал чна хайи халкьдин яшайишдин, гьал-агьвалдин, дуланажагъдин къайгъуда хьунни милли газетдин кьилин везифайрикай сад тирди кьатIузва.

"Лезги газет" республикадин гьукумдин ва лезги халкьдин арада алакъа, арачи хьиз я. Гьавиляй чна халкьдин къайгъуяр, дердияр, месэлаяр гьукумдин векилрив агакьарун ва гьакIни гьукуматди экономика еримлу авун, агьалийрин яшайиш, дуланажагъ хъсанарун патал кьабулзавай серенжемрикай халкь хабардар авун газетдин эвелимжи буржарикай яз гьисабзава.

Чахъ газетда икьван чIавалди авай хъсан адетар давамардай ва кIвалах генани еримлу хьун патал цIийивилер твадай макьсадар, ниятар ава. И кардихъ галаз алакъалу яз, чна багъри газетдихъ рикI кузвай гьар са ватанэгьлидивай газетдин ери хъсанарунин патал (тематикадин, газет туькIуьр хьунин, чIалан... жигьетдай) нихъ гьихьтин теклифар аватIа, редакциядиз ракъурун тIалабзава.

Гьуьрметлу лезги халкь, ша чна санал багъри газетдин дережа, гьакI тиражни мадни виниз акъудин, алакъаяр мадни гегьеншарин, санал кIвалахин.