Диде рик!ел хкидайла…

Чаз диде ксудай, къарагъдай ч|ав аквадачир. Ада экуьнен крар куьтягьна, чахъ - аялрик гьарай- эвер кутадай.....

Нуьк|верин макьамрихъ галаз, йифни - югъ чара тахьанмаз, чи япара дидедин са ц|иргъ гафарни жедай: «Къудгьунна къарагъа, чан балаяр, кар экуьнинди я, фад къарагьайдав кас агакьдач, югъ нисин хьанва, къуни-къуншийрикай айиб я, куьне пака чарадан к|вале фу т|уьна к|анзавайди я» 

Вилер т|ушиниз - т|ушиниз, чна гьарда жуван крар авуна мектебдиз фидайдалди, тарсарилайни са вил элкъуьрдай. Къвез алатзавай йисарихъ галаз, чунни гьар сад са патахъ акъатна...

Дидедин хтулар ч|ехи хьана. Абуру гила фад-фад хквез, чпин бадедиз куьмекардай, тек тадачир ам...

Гьар гатуз зун ватандиз хтайла, чна мукьва- кьилиди к|ват| хьана, дидедин гафар, крар рик|ел хкида. Нубатдин гатуз, ацукьна гафардайла, вахарин дердер ахъа хьана...

Ч|ехи ваха: «За мектебдиз фидайдалди, булахдилай пуд квар яд гъидай». Муькуь ваха: «За са пуд гъилер гам храдай». Пуд лагьайда: «За гъенер шткидай».

Зазни авайди тир жуван к|валах, к|елерни дана хуьруьн кьилик галай салаз тухвана хуькведай. Гьа рекье, тарсуна жаваб гана к|анзавай шиирарни хуралай чирдай… И чи гафариз кисна яб гузвай ч|ехи вахан рушавай акъвазиз хьанач: «Са йифиз чун бадедихъ галаз ксанвай. Сятдин шумуд ят|ани чидачир, чаз «къарагъа чан бадедин, за квез чими хьран фу чранва, калин некни чимнава» лугьудай ван хьана.... «Чан балаяр, сенфиз гар галаз хъсан марф къванва, алук|а пекер, неъ фу, чун к|ерец|ар хч|ализ фин. Вилик галайди зул-кьуьд я, куьн шегьерда авайбур я, гьарда са чанта к|ерец|ар твах куьне квез»

Чун - вахар алукьиз- къарагъиз мич|и рекъерай бадедин гуьгъуьна гьатна чуьлдиз фена. Вацран экуьнал чна к|ерец|рив чантаяр ац|урна хуькведайла, югъ гьелени ахъа хьанвачир.... К|вализ хтана чантаяр ич1и ийидайла к|ерец|рихъ галаз чна хч|алнавай са кьадар к|уьлуь къванерни аватна…»

Вири хъуьрена и ихтилатдал. Зи хиялриз дидедин экуь къамат ва ада фад-фад лугьудай гафар хтана: «Балаяр…гатуз - зулуз саламатдаказ гъиликай къванни хъуьт|уьз виже къведа ...»