КукIушрин кукIуш

13-апрелдиз Махачкъалада, Р. Гьамзатован тIварунихъ галай Милли библиотекада ФЛНКА-дин (Лезгийрин милли культурадин федеральный автономия) Жегьилрин департаментди Дагъустандин халкьдин шаир, зурба арифдар СтIал Сулейманан 145 йисан юбилейдиз талукь яз тешкилнавай яратмишунрин межлис кьиле фена. 

Мярекатдиз чIалаз, литературадиз вафалу, чIехи шаирдин шииратдал кьару алимар, общественный деятелар, шаирарни писателар, студентар атанвай. Кьилди къачуртIа, ина ДГПУ-дин профессор Эфенди Аквердиев, «Лезги газетдин» литературадин отделдин редактор Мердали Жалилов, Албанистикадин илимдинни ахтармишунрин институтдин директор, филологиядин илимрин доктор Фейзудин Нагъиев, литературадин критикар - Гьажи Ильясовни Халидин Эльдаров, шаирар – Зульфикъар Къафлановни Агъалар Исмаилов ва лезги интеллигенциядин хейлин маса векилар аквадай мумкинвал авай.

Иштиракчийрин фикирдиз 1934-йисуз Москвада кьиле фейи Советрин Союздин писателрин 1-Съезддал СтIал Сулейманан лентиниз къачунвай сес (рахунар – шиирар) гъуналди, межлис кьиле тухузвайбур тир Казбек Якьубхановани Таифа Шихзадаевади мярекат ачухарнавайди яз малумарна.

Абуру къейд авурвал, къенин мярекат ФЛНКА-дин Жегьилрин департаментди Махачкъалада кьиле тухузвай сад лагьай серенжем я. Фикирдик инлай кьулухъ лезгийрин машгьур векилрин юбилейриз талукьарна республикадин меркезда ихьтин межлисар мадни тешкилун ква. Межлисдин тамадайри С. Сулейманан яратмишунар чIехи ватанпересвилин, инсанпересвилин, тербиядин тешпигь авачир чешме тирдакай лагьана. Къуй чахъ «XX асирдин Гомерди» кутунвай баркаллу рехъ лайихлувилелди давамардай кьегьалар мадни хьурай.

Мярекат шаир Фейзудин Нагъиева вичин рахунралди давамарна:

- Гьуьрметлу иштиракчияр! СтIал Сулейманакай гзафбур раханва, хейлинбуру кхьенва. И кар къени давам жезва. Амма шаирдин яратмишунар гьелелигда ахтармишна акьалтIарнавач. Литературоведенида Сулейманан сатирадин, сиясатдин апологар гегьеншдиз машгьур я. Абура шаирди вич яшамиш хьайи девирда обществода агъавал ийиз хьайи пис терефар негьзава, гьахъсузвилер русвагьзава. И кар себеб яз, шаир гьукумдин векилри са шумуд сеферда тагькимарунарни авунай. 

Анжах Сулейманан зарбдиз физвай вацI хьиз гурлу бажарагъдиз абурувай манийвал гуз хьанач, акси яз, адан йигинвал мадни артух хьана. Къени чаз Сулейман, адан идеология, шаирдин яратмишунриз хас дерин философия тамамдиз малум туш. Шаирдин вири шиирар гьатнавай кьилдин ктаб чапдай акъатнавач. Ихьтин ктаб акъудун чарасуз я. Шаирдин чIаларин таржумаяр вири санал кIватI хъувуна, абурукай сечмебур хкягъунни важиблу месэлайрикай сад я. Юбилеяр къвез алатзава, амма чна ихьтин крарал кIукI гъана акьалтIарзавач. Вири и делилри литературадал, чIалал машгъул пешекаррин вилик еке кIвалах акъвазнавайдан гьакъиндай шагьидвалзава. Шаирдин юбилейдиз талукьарна ихьтин мярекат тешкилнавай жегьилар сагърай, - акьалтIарна вичин суьгьбет Ф. Нагъиева.

С. Сулейманан яратмишунрикай чпин фикирар Гьажи Ильясова, Зульфикъар Къафланова, и цIарарин авторди, ФЛНКА-дин Жегьилрин департаментдин координатор Мегьамед Алиева ва масабуру лагьана.

Жегьил писатель, таржумачи, композитор Мурад Саидова иштиракчийрин фикирдиз С. Сулейманан урус чIалаз таржума авунвай чIалар, адаз бахшна Самед Вургъуна, Осип Мандельштама кхьенвай шиирар гъана.

КIватI хьанвайбуру ДГУ-дин жуьреба-жуьре факультетрин студентар тир Владик Батманова, Айна Исмаиловади, Эльмира Идрисовади, Тагьир Исмаилова, Валида Рамалдановади фасагьатдаказ кIелай шиирар иллаки хушдиз кьабулна.

Яратмишунрин межлисдин эхирдай Жегьилрин департаментдин векилри мярекатда иштиракайбуруз сагърай лагьана ва рикIел аламукьдай шикилар яна.