Гьажиев Тагьир - Лезгийрихъ мад са генерал

«Kremlin.ru» сайтди хабар гайивал, Россиядин Президент В. Путинан 2017-йисан 22-февралдин 83-нумрадин Указдалди ва РФ—дин оборонадин министр С.Шойгудин 2017-йисан 22-февралдин 114-нумрадин Приказдалди Краснодарский крайда гьавадин космический къуватрин дивизиядин командир, ери—бине Кьурагь райондин Штулрин хуьряй тир Гьажиев Тагьир Минетуллагьовичаз генерал—майорвилин чин ганва.

Гьажиев Тагьир Минетуллагьович 1960-йисуз дидедиз хьана. 1977- йисуз ада Белиждин 1-нумрадин юкьван школа лап хъсан къиметралди акьалтlарна. Гьа и йисуз ам авиациядин летчикарни штурманар гьазурзавай Ставрополдин маршал В. Судецан тlварунихъ галай авиациядин высший военный училищедик экечlна. Инаг ада яру дипломдалди куьтягьна. Ахпа эскадрильядин командирдин къуллугъдал алаз Тагьир Гьажиев РФ-дин ПВО-дин Гьавадин военный академиядик экечlна. 1992-йисуз инаг къизилдин медалдалди акьалтlарна. Идалай гуьгъуьниз Т.Гьажиева авиациядин хиле са жерге жавабдар къуллугърал кlвалахна. Россиядин Генштабдин курсарани чирвилер къахчурла. Т.Гьажиев Чита шегьерда авай гьавадин космический къуватрин дивизиядин командирдин заместителвиле тайинарна. Ада са бязи женгерани уьтквемвилелди иштиракна.

Дивизиядин командир Россиядин Федерациядин лайихлу военный летчик, «Ватандин вилик военный рекьяй лайихлувилерай» ордендин сагьиб я. Кьилин дережадин военный летчик-испытатель яз ада цlийиз акъудай СУ-15, МИГ 25, СУ-27, МИГ-29 самолетар ишлемишиз чирна. Ада цавун бушлухра 30 агъзур сятина лув гана.

Чна Аллагьдивай лезги халкьдин баркаллу хцин къуллугъдин дережаяр мадни виниз хкаж хьун тIалабзава.