|
23:40
Жегьил пагьливан
Эхиримжи йисара гьукуматди спортдиз кьетIен фикир гунин макьсад жегьил несилдин сагъламвал хуьн я. Дагъустандин спортсменри гьеле фад вахтарилай, Советрин Союз гьукумат амайлани, чпин алакьунралди чи уьлкве дуьньядин гьар са пипIе машгьурнай. Алай аямда лагьайтIа, Россиядин тIвар дагъустанвияр тир Олимпиададин са шумуд чемпиондини мадни виниз хкажнава. Абуру гьевес кутазвай, спортдал машгъул жезвай жегьилрин кьадарни артух жезва. Ахьтинбурукай сад вичин ери-бине Докъузпара райондин Усугъчай хуьряй тир, алай вахтунда Дербентда яшамиш жезвай Муталибов Герман Рафикович я. Ада и шегьердин 13-нумрадин школадин 10-классда кIелзава. Пуд йис идалай вилик ам тренер Зияфудин Къачабеговичан гъилик штангаяр хкажунал машгъул жез эгечIна.
Агалкьунри чеб яргъалди гуьзетиз тунач. Алатнавай йисара адахъ са шумуд гъалибвални хьанва. ИкI, алатай йисуз Кьиблепатан Дагъустанда штангаяр хкажунай жегьилрин арада кьиле фейи акъажунра Германа 2-чка кьуна.
Гуьгъуьнлай Хасавюрт шегьерда жегьилрин арада кIвенкIвечивал къазанмишун патал акъажунрани ам 69 кг-дин заланвал авайбурун арада 1-чкадиз лайихлу хьана. Гележегда чна, адан ватанэгьлийри, Германахъ мадни еке агалкьунар жедайдак кIевелай умуд кутазва.
Али-Буба Эмирсултанов
«Лезги Газет»
Ниже приведены схожие материалы:
Оставьте свой комментарий!